राज्यातील रेशीम शेती उद्योगासाठी (silk worm farming) शासन विविध योजना राबवीत असते. आपल्याकडील भौगोलिक परिस्थिती आणि हवामान रेशीम शेतीसाठी पूरक आहे. उन्हाळ्यातील काही महिने वगळता इतर ऋतुत तुतीची वाढ जोमाने होऊ शकते.

योजनेचे नाव- राष्ट्रीय कृषी विकास योजनेंतर्गत तुती लागवड योजना

योजनेचे लाभार्थी- अनुसूचित जाती आणि जमाती, भटक्या जमाती, दारिद्र्य रेषेखालील इतर कुटुंबे, महिला प्रधान कुटुंबे, शारिरीक अपंगत्व असलेली कुटुंबे, इंदिरा आवास योजनेचे लाभार्थी

लाभाचे स्वरूप-
- या योजनेअंतर्गत अर्धा एकर ते पाच एकरावर तुती लागवड करणाऱ्या लाभार्थ्यास प्रति एकर वीस हजार रुपये अनुदान देण्यात येते.
- पहिल्या वर्षी सहा हजार रोजमजुरी आणि आठ हजार रुपये साहित्य स्वरूपात अनुदान देण्यात येते.
- दुसऱ्या वर्षी मजुरीपोटी तीन हजार रुपये व तिसऱ्या वर्षी मजुरीपोटी तीन हजार रुपये अनुदान देण्यात येते.

तुती रेशीम उद्योगाचे फायदे-

- रेशीम उद्योगापासून नियमित शाश्वत उत्पन्न मिळू शकते.
- एकदा तुती लागवड केल्यावर १२ ते १५ वर्षे लागवडीचा खर्च येत नाही.
- तुती रोपांची लागवड केल्यापासून ३ ते ४ महिन्यात तुती बाग किटक संगोपनासाठी योग्य होते.
- कमी पाण्यातही तुती जगत असल्यामुळे उन्हाळ्यात किंवा कमी पाण्यात बागा तग धरून राहतात.
- किड व रोग तसेच नैसर्गिक आपत्ती जसे अवकाळी पाऊस, गारपीटीपासून बागेस विशेष नुकसान होत नाही.
- इतर बागायती पिकांच्या तुलनेत तुतीच्या झाडांना पाणी कमी लागते.