सांगली ः राष्ट्रीय पशुरोग नियंत्रण कार्यक्रमांतर्गत २०२४-२५ पर्यंत लाळ्या खुरकूत (FMD Disease) आणि सांसर्गिक गर्भपात (ब्रुसेल्ला) या दोन्ही रोगांच्या प्रादुर्भावावर नियंत्रण साध्य करण्यासाठी पशुसंवर्धन विभागामार्फत लाळ्या खुरकूत आजार प्रतिबंधक लसीकरण मोहीम सुरू करण्यात आली आहे.

या मोहिमेत पशुपालकांनी आपल्या पशुधनाचे लसीकरण करून घ्यावे, असे आवाहन जिल्हा पशुसंवर्धन उपआयुक्त डॉ. एस. एस. बेडक्याळे यांनी केले आहे. केंद्र व राज्य शासनाने राष्ट्रीय पशुरोग नियंत्रण कार्यक्रमांतर्गत जिल्ह्यातील ४ ते ८ महिने वयोगटातील मादी वासरांना लसीकरण सुरू आहे.

तसेच ४ महिने वयोगटावरील सर्व लहान मोठ्या गाय व म्हैस वर्ग जनावरांतील लाळ्या खुरकूत प्रतिबंधक लसीकरण १९ डिसेंबरपासून सुरू आहे. पशुपालकांनी त्यांच्याकडील ४ महिने वयोगटावरील सर्व लहान मोठ्या गाय व म्हैस वर्ग जनावरांना लाळ्या खुरकूत प्रतिबंधक लसीकरण, ४ ते ८ महिने वयोगटातील मादी वासरांना व रेडकांना सांसर्गिक गर्भपात (ब्रुसेल्ला) या आजारावरील लसीकरण करून घ्यावे.