मंचर : ‘‘पशुसंवर्धन (Animal Husbandry) विभागाला आर्थिक निधीची कमतरता आहे. त्यामुळे प्रत्येक जनावरामागे लम्पी स्कीनच्या लसीकरणावेळी (Lumpy Vaccination) मिळणारे तीन रुपये मानधन आम्हाला नको. लस देताना जनावरांकडून आम्हाला इजा झाल्यास त्याची जबाबदारी कोण घेणार,

अशा आशयाचे निवेदन आंबेगाव तालुका पशुवैद्यकीय पशुसंवर्धन आणि दुग्धव्यवस्थापन सेवा संघाने मंचर प्रांताधिकाऱ्यांना दिले,’’ अशी माहिती तालुका संघटनेचे अध्यक्ष डॉ. संजय भोर यांनी दिली.

लसीकरण करताना जनावरांकडून दुखापत झाल्यास त्याचा खर्च आणि जबाबदारी कोण घेणार, असा प्रश्न आहे. खासगी पदविकाधारक पशुवैद्यकास संकटकाळी मदत केल्याचे प्रमाणपत्र द्यावे. या पत्रामधील पदविकाधारक पशुवैद्यकांच्या नावापुढे सौजन्य दर्शक डॉक्टर उपाधी लावण्यात आलेली नाही.

त्यामुळे पदविकाधारक पशुवैद्यकांस आदेशाद्वारे अपमानित केले आहे, अशी संघटनेच्या सदस्यांची धारणा झाली आहे. या संदर्भात आंबेगाव-जुन्नरचे प्रांताधिकारी सारंग कोडोलकर यांना मंचर येथे भेटून संघटनेच्या वतीने डॉ. संजय भोर, डॉ. सागर आरूटे, डॉ. निवृत्ती पोखरकर, डॉ. गणेश पोखरकर, डॉ. अतुल साबळे यांनी प्रातिनिधिक स्वरूपात निवेदन दिले.