Nashik News : दुधाळ जनावरे त्यातही प्रामुख्याने गायींच्या खरेदीवेळी शेतकऱ्यांनी सजग राहणे आवश्यक आहे. शबरी महामंडळाकडून वेळोवेळी याबाबत प्रशिक्षण देण्यात येते. त्याला उपस्थित राहून शिक्षण घेणे आवश्यक, असल्याचे प्रतिपादन सुरगाणा पशुधन विकास अधिकारी डॉ. संतोष शिंदे यांनी केले.

शबरी आदिवासी वित्त व विकास महामंडळ मर्यादित नाशिक आणि पंजाब नॅशनल बँक सुरगाणा यांच्या संयुक्त विद्यमाने पथदर्शी दुग्ध व्यवसाय प्रकल्पांतर्गत कुकोडणे गावामध्ये दुग्ध व्यवसाय व व्यवसाय प्रशिक्षण आयोजित करण्यात आले होते.

या वेळी ते बोलत होते. या वेळी सुरगाणा पशुधन विकास अधिकारी डॉ. अविनाश अनंतवार, शबरी आदिवासी व वित्त विकास महामंडळाचे सल्लागार शेषराव ससाणे, पशुतज्ज्ञ डॉ. संगमेश्वर पांचाळ आदी उपस्थित होते.

या वेळी कुकोडणे, प्रगत विहीर, गुहे, चिंचपाडा गावातील संयुक्त दायित्व गटातील दोनशेहून अधिक प्रतिनिधी उपस्थित होते.

या वेळी डॉ. शिंदे म्हणाले, की गायींची खरेदी करताना कोणत्या बाबी तपासल्या जाव्यात, गायींची काळजी घेताना कोणत्या बाबी प्रामुख्याने बघाव्या, वासराचे संगोपन कसे करावे, गोठा स्वच्छ कसा ठेवावा, गोठ्याचे व्यवस्थापन करत असताना मुक्तसंचार गोठा ही संकल्पना कशी राबवावी, याविषयी त्यांनी माहिती दिली.