सिंधुदुर्गनगरी : काजू (Cashew) बी खरेदीच्या दरात प्रतिकिलो ५ ते १० रुपयांनी वाढ झाली आहे. मार्च महिन्याच्या तिसऱ्या आठवड्यात देखील अपेक्षित काजू बीची आवक न झाल्यामुळे हे दर वाढल्याचे बोलले जात असून, काजू बीचा (Cashew Seeds) दर आणखी वाढण्याची शक्यता आहे. या वर्षी सरासरी २० ते २५ टक्केच उत्पादन आहे. अवकाळी पाऊस,(Unseasonal rain), सतत ढगाळ वातावरण आणि दोन वर्षांपासून असलेले कोरोनाचे सावट यामुळे काजू बागायतदार आर्थिक संकटात (financial crisis) सापडला होता. या वर्षीदेखील पहिल्या टप्प्यात काजूला आलेला मोहोर डिसेंबरमध्ये सलग २० दिवस पडलेल्या अवकाळी पावसामुळे (Unseasonal rain) कुजून गेला.

त्यानंतर डिसेंबरच्या दुसऱ्या आठवड्यात पडलेल्या थंडीमुळे (Cold) पुन्हा काजूला मोहोर आला. परंतु सतत ढगाळ वातावरण आणि ९ मार्चला झालेल्या अवकाळी पावसामुळे जिल्ह्यातील काजू पिकाचे मोठे नुकसान झाले. त्यामुळे काजू उत्पादनावर मोठा परिणाम झाला. जानेवारीपासून काही बागायतदारांच्या बागांमध्ये काजू (Cashew) बी परिपक्व होण्यास सुरुवात झाली. परंतु त्याचे प्रमाण अत्यल्प होते. तरीदेखील काजू हंगामाच्या (season) सुरुवातीला काजू बी दर प्रतिकिलो ११५ ते १२० इतकाच राहिला.

काजू खरेदीदारांना देखील काजू बीची आवक वाढेल अशी अपेक्षा होती. त्यामुळे त्यांनी काजू बीचे दर काही दिवस स्थिर ठेवले. परंतु आता मार्च महिना सुरू होऊन २० दिवस उलटून गेले आहेत. या महिन्यात काजू हंगाम पूर्णपणे बहरत असतो. परंतु अजूनही अपेक्षेप्रमाणे काजू बी बाजारात (Market) विक्रीसाठी येत नसल्यामुळे आता खरेदीदारांनी काजू बी दरात वाढ केली आहे. सध्या आठवडेबाजारात काजू बी १२५ ते १३० रुपयांनी खरेदी करण्यास सुरुवात केली असून, प्रतिकिलो ५ ते १० रुपयांनी दरात वाढ केली आहे. हा दर आणखी पाच ते दहा रुपयांनी वाढण्याची शक्यता आहे.