Dharashiv News : कृषी विभागाकडून रब्बी हंगामासाठीची तयारी सुरू करण्यात आली आहे. धाराशिव तालुक्यात पीक प्रात्यक्षिके आणि प्रमाणित बियाणे वाटप कार्यक्रम लवकरच राबविण्यात येणार आहे, अशी माहिती तालुका कृषी कार्यालयातील अधिकाऱ्यांनी दिली.

रब्बीसाठी शेतकऱ्यांना प्रमाणित बियाणे वितरित करण्यात येणार आहे. त्यासाठी शेतकऱ्यांनी महाडीबीटीवर ऑनलाइन अर्ज करणे गरजेचे आहे. त्यातून सोडत पद्धतीने निवडलेल्या तीन प्रवर्गातील शेतकऱ्यांना हे बियाणे देण्यात येईल.

यात दहा वर्षांच्या आतील आणि दहा वर्षांवरील वाणांचा समावेश आहे. दहा वर्षांच्या आतील वाणांसाठी एकूण ४७७ लाभार्थ्यांची निवड होईल. यात सर्वसाधारण गटातील ३५७, अनुसूचित जातीमधील ८१ तर अनुसुचित जमातीतील ४१ लाभार्थ्यांची निवड होईल.

दहा वर्षांवरील ज्वारीच्या वाणांसाठी १७८ लाभार्थ्यांची निवड होईल. त्यात सर्वसाधारणमधील १३३, अनुसूचित जातीतील ३० तर अनुसूचित जमातीतील १५ लाभार्थी निवडले जातील.

 गावांची निवड मंडल स्तरावर होणार

पीक प्रात्यक्षिकांचा कार्यक्रम देखील राबविण्यात येणार आहे. त्यासाठी गावांची निवड मंडलस्तरावर होणार आहे. तालुक्यातील निवड झालेल्या गावांत जवळपास ८४० पीक प्रात्यक्षिके होणार आहेत.

प्रतिशेतकरी ४ किलो ज्वारीचे बियाणे देण्यात येईल, त्यासाठीचे ८४ क्विंटल ज्वारीचे बियाणे तालुका कृषी कार्यालयात दाखल झाले आहे, अशी माहिती धाराशिव तालुका कृषी कार्यालयातील अधिकाऱ्यांनी दिली.