Washim News : बुद्ध पौर्णिमेच्या लख्ख चंद्र प्रकाशात वाशीम-अकोला जिल्ह्याच्या सीमेलगत असलेल्या काटेपूर्णा अभयारण्यात वन्यजीवांची गणना करण्यात आली. महाराष्ट्रातील अनेक जिल्ह्यांतून आलेल्या वन्यप्रेमींनी रात्रभर मचाणावर जागून या निसर्ग अनुभवाचा आनंद लुटला.

चंद्राच्या लख्ख प्रकाशात न्हालेल्या बुद्ध पौर्णिमेच्या रात्री, काटेपूर्णा अभयारण्यात वन्यजीव आणि पक्ष्यांची गणना उत्साहात पार पडली. सोमवारी (ता. १२) दुपारी दोनपासून सुरू झालेल्या या उपक्रमात सहभागी पर्यटकांनी मचाणावरून रात्रभर निरीक्षण करीत प्राण्यांच्या हालचालींच्या नोंदी घेतल्या.

सुमारे ६५०० हेक्टरमध्ये पसरलेल्या या अभयारण्यात नैसर्गिक व कृत्रिम पाणवठ्यांभोवती १० मचाण उभारण्यात आले होते. प्राणी गणनेसाठी पौर्णिमा ही विशेष मानली जाते. चंद्रप्रकाश तेजस्वी असतो आणि उन्हामुळे प्राणी रात्री पाण्यासाठी बाहेर पडतात.

काटेपूर्णा अभयारण्यात बिबट, चितळ, सांबर, काळवीट, नीलगाय, तसेच अनेक दुर्मिळ पक्ष्यांच्या प्रजातीही आढळतात. प्राण्यांचे आवाज, पक्ष्यांची किलबिल आणि निसर्गाच्या सान्निध्यात मिळालेला अनुभव वन्यप्रेमींना आयुष्यभर लक्षात राहणारा ठरला. या वेळी काही वन्यप्रेमींना बिबट्याचेही दर्शन झाल्याने त्यांचा आनंद वेगळाच होता.

प्राणिगणनेत नोंद झालेले एकूण प्राणी - ३६९

बिबट - ३, चितळ - ८७, चिंकारा - २, अस्वल - १, निलगाय - ६४, रानडुक्कर - ५७, कोल्हा - ९, मोर - ३७, उदमांजर- ५, रानमांजर - ६, सायाळ - ११, ससे - ०४, भेकडी - ५, माकड - ७५, रानकुत्रा - ३