Jalgaon News : बोदवड, मुक्‍ताईनगरसह जळगाव आणि बुलडाणा जिल्ह्यांतील सहा तालुक्यांसाठी फायदेशीर ठरणाऱ्या बोदवड उपसा सिंचन योजनेच्या कामासाठी मागील वर्षी ९६ कोटी रुपयांना मंजुरी मिळाली आहे.

यामुळे दुष्काळी भागात गणल्या जाणाऱ्या बोदवडला लाभ होणार आहे. पण योजनेचे काम प्रत्यक्षात केव्हा सुरू होईल, असा सवाल शेतकऱ्यांकडून केला जात आहे. या योजनेत दोन टप्पे आहेत. पहिल्या टप्प्यात जुनोने धरण व दुसऱ्या टप्प्यात जामठी धरण आहे.

मात्र २०१७ ला राज्य मंत्रिमंडळाची जी एकला मान्यता मिळाली ती केवळ टप्पा एकला मिळाली आहे. त्यातच टप्पा एकचे काम जवळपास ८० टक्के पूर्ण झाले असून, टप्पा दोनच्या कामाला गती मिळणार आहे.

आस होणार लाभ

जळगाव आणि बुलडाणा जिल्ह्यांतील ५३ हजार ४४९ हेक्‍टर क्षेत्रासाठी संजीवनी ठरणारी ही उपसा सिंचन योजना आहे. या प्रकल्पात जळगाव जिल्ह्यातील ३३ हजार ६६८ हेक्‍टर आणि बुलडाणा जिल्ह्यातील १९ हजार ७८१ हेक्‍टर क्षेत्राला सिंचनाचा लाम होणार आहे.

दोन टप्प्यांत काम

२०११ मध्ये तत्कालीन राष्ट्रपती प्रतिभाताई पाटील यांच्या हस्ते या प्रकल्पाचे भूमिपूजन झाले होते. प्रकल्पाच्या पहिल्या टप्प्यात १४ हजार ९९४ हेक्‍टर, दुसऱ्या टप्प्यात ३८ हजार ४५५ हेक्‍टर जमिनीवर सिंचनाचा लाभ मिळणार आहे. यात बोदवड, जामनेर आणि मुक्‍ताईनगर तालुक्‍यांना लाभ होणार आहे. त्यासाठी कामाचा प्रारंभ करण्याची मागणी केली जात आहे.