Pune News: देशी गाय संशोधन केंद्रातील देशी गाईची माहिती ही अत्यंत महत्त्वाची आहे. गोवंश शेतकऱ्यांसाठी महत्त्वाच्या आहेत. पुढील काळात जेथे जेथे गोवंश शाळा असतील त्या ठिकाणी भेटी देऊन गोशाळेचे महत्त्व समजून घेऊ, असे मत विधानसभेचे उपाध्यक्ष अण्णा बनसोडे यांनी व्यक्त केले.

पुणे कृषी महाविद्यालयातील देशी गाय संशोधन व प्रशिक्षण केंद्र आणि पुणे जिल्हा मध्यवर्ती सहकारी बॅंक आयोजित देशी गोवंश जतन व संवर्धन दिन सप्ताहाची सांगता मंगळवारी (ता. २२) झाली. या वेळी क्रीडा व युवक कल्याण मंत्री दत्तात्रय भरणे, गोसेवा आयोगाचे अध्यक्ष शेखर मुंदडा, जिल्हा बँकेचे अध्यक्ष प्रा. डॉ. दिगंबर दुर्गाडे, महाराष्ट्र राज्य कृषी शिक्षण व संशोधन परिषदेचे उपाध्यक्ष तुषार पवार, महात्मा फुले कृषी विद्यापीठाचे कृषी अधिष्ठाता डॉ. साताप्पा खरबडे, विस्तार शिक्षण संचालक डॉ. गोरक्ष ससाणे, पुणे कृषी महाविद्यालयाचे सहयोगी

अधिष्ठाता डॉ. महानंद माने आदी उपस्थित होते. या वेळी देशी गाईचे संवर्धन करणाऱ्या शेतकऱ्यांचा उपस्थितांच्या हस्ते सन्मान करण्यात आला. श्री. भरणे म्हणाले, की मी सुद्धा शेतकरी कुटुंबातील आहे. त्यामुळे या देशी गाई शेतकऱ्यांसाठी गरजेच्या आहेत. या गाईचे जतन व संवर्धन होण्याची गरज आहे.

ती आनंद देणारी आहे. आज शेती परवडत नाही, असे आपण म्हणतो, पण जो असे म्हणतो, तो शेतीत जात नाही. मात्र, जो शेतीत दररोज जातो, काम करतो, त्यांना ती परवडते. म्हणून पुढील काळात शेती ही महत्त्वाची आहे. २०२९ नंतर शेतीची उंची ही उद्योगाच्या उंचीची होईल, यात शंका नाही.

कार्यक्रमात सूत्रसंचालन डॉ. मृणाल अजोतिकर यांनी केले. तर सहयोगी अधिष्ठाता डॉ. माने यांनी आभार मानले गोसंवर्धनात काम करणाऱ्या शेतकऱ्यांचा सन्मान जनार्दन चव्हाण, जितेंद्र मुरकुटे, दीपक पत्की, मिलिंद ठोंबरे, रामचंद्र ढेबे, सचिन ताम्हाणे, सुनील हरपुडे, रतन भोसले, यशवंत खैरे, नंदू चौधरी, विठ्ठल जगताप, संदीप बोदगे, राजवीर स्मिता रवींद्र लाड, किरण जाधव, राजेंद्र अथणे, विपुल कृष्णा अष्टेकर, प्रकाश बाफना, मिलिंद कृष्णाजी देवल.