Nanded News : सध्या उन्हाचे चटके वाढल्याने जिल्ह्याच्या प्रकल्पातील पाणीपातळीत झपाट्याने घट होत आहे. जिल्ह्यातील मोठे, मध्यम, लघू प्रकल्प, केटीवेअरसह उच्च पातळी बंधाऱ्यात सध्या २९९.३६ दशलक्ष घनमीटरनुसार ४१.११ टक्के पाणीसाठा शिल्लक आहे, अशी माहिती नांदेड पाटबंधारे विभागाकडून देण्यात आली.

मागील वर्षी पावसाळ्यातील पाच महिन्यांत झालेल्या जोरदार पावसामुळे जिल्ह्यातील संपूर्ण प्रकल्पात शंभर टक्के पाणीसाठा झाला होता. यामुळे नांदेड पाटबंधारे विभागाने रब्बी तसेच उन्हाळी पाणी पाळ्यांचे नियोजन करून सिंचनासाठी पाणी सोडण्यात आले. तसेच मागील एक महिन्यापासून तापमानाचा पारा वाढल्याने उन्हाचे चटके बसत आहेत.

यामुळे सध्या पाणी पातळीत घट होत आहे. सध्या २९९.३६ दशलक्ष घणमीटरनुसार ४१.११ टक्के पाणीसाठा शिल्लक आहे. जिल्ह्यात मोठा प्रकल्प असलेल्या विष्णुपुरी प्रकल्पात ५२.५६ टक्के पाणी शिल्लक आहे. तर दुसरा मोठा प्रकल्प असलेल्या मानार (बारुळ) प्रकल्पात ४७.०७ टक्के पाणीसाठा आहे.

यासोबतच जिल्ह्यातील नऊ मध्यम प्रकल्पात ४३.२५ टक्के, चार कोल्हापुरी बंधाऱ्यात ०.१३ टक्के, ८८ लघू प्रकल्पात २९.२९ टक्के, नऊ उच्च पातळी बंधाऱ्यात ४१.०५ टक्के असा एकूण २९९.३६ दशलक्ष घणमीटरनुसार ४१.११ टक्के पाणीसाठा शिल्लक आहे.

यासोबतच नांदेड जिल्ह्याशेजारी असलेल्या परभणी जिल्ह्यातील येलदरी प्रकल्पात ५३७.८० दलघमीनुसार ४४.४१ टक्के व सिद्धेश्‍वर प्रकल्पात ४२.१७ दलघमीनुसार ५२.४५ टक्के तसेच यवतमाळ जिल्ह्यातील ऊर्ध्व पैनगंगा (इसापूर) या प्रकल्पात ६०४.०० दलघमीनुसार ६२.४५ टक्के पाणीसाठा शिल्लक आहे.

जिल्ह्याशेजारील प्रकल्प

येलदरी ५३७.८० ६६.४१

सिद्धेश्‍वर ४२.१७ ५२.४५

इसापूर ६०४.०० ६२.६५

प्रकल्पनिहाय पाणीसाठा

प्रकल्प दलघमी टक्केवारी

विष्णुपुरी ३८.०३ ४७.०७

मानार ७२.६४ ५२.५६

मध्यम प्रकल्प (९) ६०.१५ ४३.२५

लघू प्रकल्प (८८) ५०.६२ २९.२९

उच्चपातळी बंधारे (९) ७७.९१ ४१.०५

कोपबंधारे चार (चार) ०.०१ ०.१३

एकूण प्रकल्प ११२ २९९.३६ ४१.११