Murbad News: काळू धरण प्रकल्पाच्या प्रस्तावित बांधकामामुळे मुरबाड तालुक्यातील बुडीत क्षेत्रातील गावांचे भविष्य धोक्यात आले आहे. या पार्श्वभूमीवर पुनर्वसन धोरणावर चर्चा करण्यासाठी मुरबाड तालुक्यात सरकारकडून विशेष ग्रामसभा आयोजित केल्या जात आहेत.

मात्र, तळेगाव येथे बुधवारी (ता. ६) दुपारी झालेल्या ग्रामसभेत आम्हाला काळू धरणच नको. या ग्रामसभा अनाठायी असून धरणाला ग्रामस्थांनी ठाम विरोध दर्शविला आहे.तालुक्यातील काळू नदीवर होणाऱ्या धरणामुळे बाधितांच्या पुनर्वसनासाठी खासगी जमिनीच्या भूसंपादन प्रस्तावाविषयी चर्चा करण्यासाठी बाधित क्षेत्रातील ग्रामपंचायतीतर्फे विशेष ग्रामसभा होत आहेत.

श्री विठ्ठल रुक्मिणी मंदिर, तळेगाव येथे बुडीत क्षेत्रातील नागरिकांची पुनर्वसन या विषयावर बुधवारी बैठक झाली. या बैठकीत काळू धरण हे परिसरातील लोकांवर लादण्यात आले आहे. कोणत्याही परिस्थितीत धरणाला विरोध कायम ठेवून यापुढे संघर्ष अधिक तीव्र करण्याचा निर्धार उपस्थितांनी बोलून दाखवला.

वेळ पडल्यास रास्ता रोको, धरणे आंदोलन करण्याची तयारी ठेवली पाहिजे, असे माजी उपसभापती भगवान भला म्हणाले. तर धरणाविरोधी ठराव करून एकमताने विरोध दर्शवण्याचे आवाहन विलास काका देशमुख यांनी केले. तळेगाव ग्रामपंचायतीची ग्रामसभा मंगळवारी (ता. १२) होणार आहे.

मात्र, काळू धरणग्रस्तांचा धरणाला विरोध कायम असून पुन्हा संघर्ष पुकारण्याचे ठरविले आहे. बैठकीला प्रवीण देशमुख, विनोद राऊत, बापू देशमुख, शशी देशमुख, संभाजी गोडांबे, अरुण चौधरी, गुलाबराव देशमुख, अरुण राऊत, रंगनाथ देशमुख, बाळकृष्ण पठारे, रघुनाथ ठाकरे उपस्थित होते.

प्रकल्पाविरोधात एल्गार

सामाजिक कार्यकर्ते हरिभाऊ राऊत यांनी, आम्हाला काळू धरणच नको आहे, तर मग पुनर्वसन किंवा भूसंपादनावर चर्चा कशासाठी? असा थेट सवाल ग्रामसभेत उपस्थित केला. धरणासंबंधी तांत्रिक बाबी अपूर्ण असताना विशेष ग्रामसभांचा अट्टाहास धरून सरकार अन्याय करत आहे.हा प्रयत्न सर्वांनी मिळून हाणून पाडण्याचा निर्धार करण्याचे आवाहन किसन आलम यांनी केले. आपल्या परिसराला देशोधडीला लावणारा हा प्रकल्प आहे, असे शिवराम हिलम यांनी स्पष्ट केले.