Palghar News : लांबलेल्या पावसाने पावसाळी शेतीचे नुकसान होत असल्यामुळे शेतकरी हैराण झाले आहेत. यामुळे सध्या डहाणू भागातील अनेक शेतकरी भातशेतीबरोबरच इतर भाजीपाला, फुलांची लागवड करू लागले आहेत.

भात काढणीनंतर मिरची, कलिंगड, पालेभाजी, फळभाजीसह फुलांची लागवड करून रोजगार मिळवला जात आहे. खते, बी-बियाणे, शेतमजुरांचे वाढते दर यामुळे भातशेती तोट्यात जात असल्याचे शेतकरी सांगत आहेत.

कासा, वाघाडी, धरमपूर, सोनाळे परिसरातील अनेक शेतकरी भाताच्या शेतीव्यतिरिक्त पालेभाजी, कारली, मिरची, तूर, दुधी, कलिंगड, मोगरा, झेंडूचे मोठ्या प्रमाणात उत्पादन घेत आहेत. बोअरवेल, कालव्याचे तसेच नदी-नाल्याचे पाणी वापरून भाजीपाला लागवड केली जाते. यामध्ये कारली लागवड करण्यावर जास्त भर दिला जात आहे.