Grape Production : वाशी : डिसेंबर उलटून गेला तरी बाजारात द्राक्षांची हवी तशी आवक झालेली नाही. अवकाळीचा फटका द्राक्षाच्या बागांना बसल्याने हंगाम लांबला आहे. त्यामुळे ग्राहकांना अजून काही दिवस प्रतीक्षा करावी लागेल, असे व्यापाऱ्यांकडून सांगण्यात येत आहे. हिवाळ्यात द्राक्ष पिकाला बहर येतो.

नोव्हेंबर-डिसेंबरच्या काळात फळ बाजार काळ्या-हिरव्या टपोऱ्या मण्यांनी भरलेले द्राक्षांचे घड नागरिकांचे लक्ष वेधून घेत असतात. वाशीच्या एपीएमसी फळ बाजारात नोव्हेंबरच्या मध्यापासूनच द्राक्षे येऊ लागतात. डिसेंबरमध्ये नाताळनिमित्त द्राक्षांना चांगला भावही मिळतो.

यंदा एपीएमसीत द्राक्षांची अगदी तुरळक आवक पाहायला मिळत असून, त्यामुळे दरात सुधारणा झाली आहे. बाजारात महाराष्ट्रातून फार कमी प्रमाणात द्राक्षे येत आहेत. अवकाळीचा फटका बसल्याने द्राक्षाचे मोठे नुकसान झाले आहे. त्यामुळे हंगाम सुरू होऊनदेखील बाजारात द्राक्षे मिळत नसल्याने ग्राहकांचा काहीसा हिरमोड झाला आहे.

घाऊक बाजारातील

भाव (१० किलो)

काळी द्राक्षे

१,६०० रुपये

हिरवी द्राक्षे

१,१०० रुपये

अनेक शेतकऱ्यांचा माल त्यांच्या बांधावरूनच खरेदी केला जात असल्याने एपीएमसी फळ बाजारात मागणी असूनही द्राक्षे कमी प्रमाणात उपलब्ध आहेत. गेल्या वर्षीच्या तुलनेत द्राक्षाचे उत्पादन ३० ते ४० टक्क्यांनी घटले आहे. त्यामुळे यंदा भाव चढेच राहण्याची शक्यता आहे. इतर राज्यांतून माल आल्यास भावामध्ये काहीसा फरक पडेल. नाशिकहून येणारी द्राक्षे जानेवारीच्या १५ तारखेनंतर बाजारात येऊ लागतील, तोपर्यंत बाजारात भाव चांगला राहील.

- जितेंद्र मुरकुटे, व्यापारी, एपीएमसी

मागणी जास्त, पुरवठा कमी

वाशी बाजार समितीत सध्या महाराष्ट्रातील बारामती, तासगाव या ठिकाणांहून द्राक्षे विक्रीसाठी येत आहेत. काही प्रमाणात कर्नाटकातूनही येत असल्याचे व्यापारी सांगत आहेत. १ जानेवारीला ५७९ क्विंटल आवक झाली. त्या वेळी किलोला ६० ते ९० रुपये दर होता. सध्या काळी आणि हिरवी द्राक्षे उपलब्ध असून, मालाचा पुरेसा पुरवठा नसल्याने भाव वाढले आहेत.