Beed News : शासनाने जिल्ह्यात दुष्काळ सदृश्यस्थिती जाहीर केल्याने शेतकऱ्यांना आतापर्यंत ५६ कोटी ८० लाख रुपये वीज बिल सवलत दिली. यातून वंचित राहिलेल्या ३६ हजार शेतकऱ्यांना हा लाभ देण्याचा सकारात्मक निर्णय घेतला आहे. त्याची पूर्तता करण्याचे निर्देश राज्याचे कृषिमंत्री व बीड जिल्ह्याचे पालकमंत्री धनंजय मुंडे यांनी दिले.

जिल्ह्यातील वीज वितरण व आनुषंगिक बाबींचा आढावा पालकमंत्री श्री. मुंडे यांनी शुक्रवारी (ता. १४) जिल्हाधिकारी कार्यालयात झालेल्या बैठकीत घेतला. या बैठकीस माजलगावचे आमदार प्रकाश सोळंके, आष्टीचे आमदार बाळासाहेब आजबे, जिल्हाधिकारी दीपा मुधोळ- मुंडे, जिल्हा परिषदचे मुख्य कार्यकारी अधिकारी अविनाश पाठक तसेच वीज वितरण कंपनीचे अधिकारी अभियंता एम. डी घुर्मे, कार्यकारी अभियंता अ.ना.पाटील उपस्थित होते.

पालकमंत्री मुंडे म्हणाले, की विविध तालुक्यात वीज मंडळाचे काम करणाऱ्या बाह्य यंत्रणांची संख्या कमी आहे. यामुळे त्वरित खंडित वीज पुरवठा सुरळीत करणे शक्य होत नाही हे लक्षात घेऊन विभागनिहाय या यंत्रणांची संख्या वाढवून त्वरित सेवा प्रदान करण्याच्या दृष्टिकोनातून वीज वितरण कंपनीने पावले उचलावीत.

कृषी पंप जोडणी जिल्ह्यात आजमितीस कृषी पंपासाठी वीज पुरवठा मागणाऱ्या शेतकऱ्यांची संख्या ४७७० आहे. ही जोडणी मार्च अखेर पूर्ण होणे अपेक्षित असले तरी याला गती देऊन ही सर्व जोडणी डिसेंबर २०२४ पूर्वी पूर्ण करा अशा प्रकारचे निर्देश श्री मुंडे यांनी यावेळी दिले.शेतकऱ्यांना दिवसा आठ तास व रात्री दहा तास विद्युत पुरवठ्याचे लक्ष समोर ठेवून कामे करा.

उर्वरित शेतकऱ्यांना मिळणार वीज बिल माफीचा लाभ

शासनाने संपूर्ण बीड जिल्हा दुष्काळ सदृश्यस्थितीचा जिल्हा घोषित केला. यातील तरतुदीनुसार शेतकऱ्यांना ३३ टक्के वीज बिल माफीचा निर्णय शासनाने घेतला होता. जिल्ह्यात असलेल्या एक लाख ८३ हजार २८२ कृषी जोडण्यापैकी १ लाख ४७ हजार शेतकऱ्यांना दर तिमाही २८ लाख ४० लाख याप्रमाणे सवलत प्रदान करण्यात आली आहे.

दोन तिमाही एकूण ५६ लाख ८० हजाराची सवलत शेतकऱ्यांना मिळाली आहे. उर्वरित ३६ हजाराहून अधिक शेतकऱ्यांना लाभ द्यायचा बाकी आहे. शासन याबाबत सकारात्मक आहे हा लाभ त्या सर्व शेतकऱ्यांना त्वरित देण्याचे निर्देश पालकमंत्री श्री मुंडे यांनी दिले.