Bhor News: कृषी व शेतकरी कल्याण मंत्रालय, भारतीय कृषी संशोधन परिषदेच्या वतीने आयोजित विकसित कृषी संकल्प अभियान देशभरात १२ जूनपर्यंत राबविण्यात येत आहे. या अभियानांतर्गत जिल्हा कृषी विभाग, आत्मा, कृषी विज्ञान केंद्र बरामती व महात्मा फुले कृषी विद्यापीठाच्या वतीने भोर तालुक्यात १२ गावांमध्ये विविध कृषी उपक्रम राबवले जात आहेत.

जिल्हा अधीक्षक कृषी अधिकारी पुणे संजय काचोळे, प्रकल्प संचालक ‘आत्मा’ पुणे सूरज मडके व तालुका कृषी अधिकारी शरद धर्माधिकारी यांच्या मार्गदर्शनाखाली राबविल्या जात असलेल्या उपक्रमाद्वारे कृषी तंत्रज्ञानाची माहिती गावोगावी जाऊन शेतकऱ्यांपर्यंत पोहोचविण्यात येत आहे.

या अभियानात नाविन्यपूर्ण शेती, भात सोयाबीन उत्पादन तंत्रज्ञान, नैसर्गिक शेती, बांबू लागवड तंत्रज्ञान, माती परीक्षणाचे महत्त्व, शेतीमाल ब्रंडिंग व विक्री व्यवस्थापन, बियाणे खते, रोपे आणि विविध शासकीय योजनांची माहिती देण्यात येत आहे.

मार्गदर्शकांनी गावामध्ये शेतकऱ्यांच्या बांधावर जाऊन शेतकऱ्यांना मार्गदर्शन केले जातेय. यामध्ये संशोधन केंद्रातील शास्त्रज्ञ, कृषी अधिकारी, आत्मा अधिकारी, कृषी विज्ञान केंद्राचे शास्त्रज्ञ,विद्यापीठाचे शास्त्रज्ञ सहभागी आहेत. संशोधकांनी शेतकऱ्यांशी थेट संवाद साधून शेती व संबंधित व्यवसायाबाबत मार्गदर्शन केले.

भोर तालुक्यातील मौजे नाटंबी, खानापूर, उत्रोली, न्हावी, भाबवडे, भोंगवली, पांडे, सारोळा, खडकी, माळेगाव, केळवडे, शिवरे या गावांमध्ये विकसित कृषी संकल्प अभियान रबविण्यात येत आहे.