Ahilyanagar News : मजुरांना रोजगार मिळावा यासाठी सुरू असलेल्या महात्मा गांधी राष्ट्रीय ग्रामीण रोजगार हमी योजनेच्या (नरेगा) कामावर राज्यात सध्या सुमारे २ लाख ३४ हजार मजूर काम करत आहेत. ९ हजार ३७८ ग्रामपंचायतीत ४० हजार ६९६ कामे सुरू आहेत. दिवाळीनंतर मात्र रोजगार हमीच्या कामावर मजूर वाढतील, असे सांगितले जात आहे.

ग्रामीण भागात मजुरांना रोजगार मिळावा यासाठी महात्मा गांधी राष्ट्रीय ग्रामीण रोजगार हमी योजनेतून (नरेगा) सिंचन विहिरी, जंगलातील वृक्षलागवड, फळबाग लागवड, रस्ते, गाय गोठे, शेळीपालन निवारे, घरकुले, शेततळे, शेषखड्डे, शाळांना संरक्षणभिंत, ग्रामपंचायत इमारती (ग्रामपंचायत भवन), बचतगट भवन, रोपवाटिका, पेव्हींग ब्लॉक बसवणे यासह सुमारे २६२ प्रकारची विविध कामे कृषी, जलसंधारण, ग्रामपंचायत, वन व अन्य विभागामार्फत केली जातात.

पावसाळ्यात बहुतांश ठिकाणी रोहयोमधील सिंचन विहीरी, शेततळ्याची कामे बंद होती. आता ती सुरू होणार आहेत. राज्यात २८ हजार २७४ ग्रामपंचायती असून सध्या ९ हजार ३७८ ग्रामपंचायतीच्या माध्यमातून ४० हजार ६९६ कामे सुरू आहेत. या कामांवर २ लाख ३४ हजार ४२१ मजूर काम करत आहेत. रोजगार हमी योजनेच्या कामांवर २७३ रुपये दर दिवसाला मजुरी मिळत असल्याने राज्यात रोज सहा कोटी ३३ लाख रुपये दर दिवसाला मजुरीवर खर्च होत आहेत.

दिवाळीचा काळ असल्याने ‘रोहयो’च्या कामांवर मजुरांची संख्या कमी होती. मात्र दिवाळीनंतर विहीरी, शेततळ्यासह पावसाळ्यामुळे बंद असलेली महात्मा गांधी राष्ट्रीय ग्रामीण रोजगार हमी योजनेतील कामे सुरू होणार असल्याने साधारण पाच नोव्हेंबरनंतर मजुरांच्या संख्येतही बऱ्यापैकी वाढ होणार असल्याचे ग्रामविकास विभागातून सांगण्यात आले.

जिल्हानिहाय मजूरसंख्या (कंसात कामे)

अहिल्यानगर : ९,१४५ (१३०९), अकोला : ६,२५७ (१४९६), अमरावती : २६४४६ (४९२४), बीड : १०९९० (१०८१), भंडारा : ३१८७ (५१९) बुलडाणा : ३८४५ (७४७), चंद्रपूर : १०७३१ (२००१), छत्रपती संभाजीनगर : १६९६४ (२१८९), धाराशीव : १७६६ (२००), धुळे : ९९२२ (१५४२), गडचिरोली : ४७०९ (८०१), गोंदिया : १०२७४ (१७६१), हिंगोली : ४६७५ (३२०), जळगाव : १००९४ (१५९४), जालना : १५१७१ (१४०१), कोल्हापुर : १९५२ (३०३), लातुर : ५८४७ (७८१), नागपूर : ५०७३ (१३८३), नांदेड : ११९६२ (१६३५), नंदुरबार : ११८५६ (३९४५), नाशिक : ८७४१ (१८९८), पालघर : ४५४४ (९३५), परभणी : ६००७ (८०४), पुणे : १९८६ (३७५), रायगड : ९६३ (३२७), रत्नागिरी : १८३९ (६२३), सांगली : २८४८ (३९३), सातारा : २९८३ (५२४), सिंधुदुर्ग : ११८१ (४४१), सोलापूर : ६०५९ (८६०), ठाणे : १२२९ (३९९), वर्धा : २९३७ (७६३), वाशीम : २७४७ (५४४), यवतमाळ : ९४९१ (१८७८)