Jalgaon News : मजूरटंचाई व सततचा पाऊस यामुळे खानदेशात तणनाशकांचा वापर यंदा २० टक्क्यांनी वाढल्याचे दिसत आहे. कापूस, केळी, ऊस, मका, तूर, उडीद, मूग, सोयाबीन आदी सर्व पिकांत तणनाशकांचा उपयोग झाला आहे.

एकट्या जळगाव जिल्ह्यात नऊ लाख लिटर विविध तणनाशकांचा उपयोग होईल, असा अंदाज होता. पण यापेक्षा अधिकचा उपयोग झाला आहे . धुळे व नंदुरबारातही सुमारे तीन लाख लीटरपेक्षा अधिकचा उपयोग तणनाशकांचा झाला आहे. जळगाव जिल्ह्यात यंदा सप्टेंबरअखेर २२ ते २३ लाख लिटर तणनाशकांचा उपयोग झाल्याची माहिती आहे. यंदा तणनाशकांचा उपयोग २० ते २५ टक्के अधिक झाला आहे.

पेरण्या वेळेत झाल्या. पिके तरारली. पण सततच्या पावसाने आंतरमशागतीसाठी वाफसा नव्हता. मजूरटंचाई सुरवातीपासून आहे. मजुरीदर अधिक आहेत. ते परवडत नाहीत. ट्रॅक्टर, बैलजोडीने कापूस, केळी, सोयाबीन व अन्य तृणधान्य, कडधान्य पिकांत आंतरमशागत करण्यासाठी वाफसा नसल्याने तण वाढत गेले. बाजारात विविध कंपन्यांचे तणनाशक विक्रीसाठी आहेत.

कापूस, सोयाबीन, उडीद, मूग, तूर, मका, केळी , ऊस या पिकांसाठी स्वतंत्र तणनाशके बाजारात आहेत. त्यांचा वापर शेतकरी करीत हते. अजूनही केळी पिकात तणनाशकांचा उपयोग सुरू आहे. जळगाव जिल्ह्यात कापूस, सोयाबीन व मका पिकांत तणनाशकांचा सर्वाधिक उपयोग झाला आहे.

कापसाची लागवड पाच लाख ११ हजार हेक्टरपेक्षा अधिक आहे. मका लागवड एक लाख हेक्टरवर होती. तर सोयाबीनची पेरणीदेखील जळगावात ३२ हजार हेक्टरवर झाली होती. या पिकांत तणनाशके अधिकची वापरण्यात आली.

एमआरपीएवढे विक्री दर

तणनाशकांची मागणी वाढल्याचे लक्षात घेऊन त्यांची विक्री एमआरपीएवढ्या दरात सुरू होती. मध्यंतरी एमआरपीपेक्षा १०० ते २०० रुपये कमी दर काही तणनाशकांच्या विक्रीसंबंधी होते. परंतु मागणी अधिक व पुरवठा कमी, नफेखोरी यातून आता एमआरपीनुसार त्यांची विक्री झाली. यामुळे शेतकऱ्यांचा उत्पादन खर्च वाढला आहे.