Akola News : बाळापूर तालुक्यातील मौजे खामखेड येथे कृषी तंत्रज्ञान व्यवस्थापन यंत्रणा (आत्मा) व कृषी विभागामार्फत खरीप तूर पीक लागवड तंत्रज्ञान या विषयावर शेतीशाळा घेण्यात आली.

आत्मा प्रकल्प संचालक डॉ. मुरली इंगळे, तालुका कृषी अधिकारी नंदकुमार माने यांच्या मार्गदर्शनात हा कार्यक्रम झाला.

या शेतीशाळेमध्ये डॉ. पंजाबराव देशमुख कृषी विद्यापीठातील बियाणे तंत्रज्ञान संशोधन विभागातील डॉ. गजानन लांडे, आत्मा तालुका तंत्र अधिकारी विजय शेगोकार, कृषी सहाय्यक गोपाल राऊत उपस्थित होते.

कीटकशास्त्रज्ञ डॉ. लांडे यांनी समाधानकारक पाऊस पडल्यानंतर वाफसा येताच कुळवणी करावी. त्यानंतरच योग्य ओल असताना तुरीची पेरणी करावी. पेरणीपूर्वी बियाण्यास बुरशीनाशकाची रायझोबीयम जिवाणू संवर्धकाची प्रक्रिया करूनच पिकाची पेरणी करावी, असे आवाहन केले.

श्री. शेगोकार यांनी तूर पिकाचे लागवड तंत्र, सुधारित वाणाची निवड, बीज प्रक्रियेवर मार्गदर्शन केले. गोपाल राऊत यांनी विविध योजनांची माहिती दिली.