Pune News: कृषी विभागातील बदल्यांच्या घोडेबाजाराला लगाम घालण्यासाठी कृषी आयुक्त सूरज मांढरे यांनी समुपदेशन पद्धत पुन्हा सुरू केली आहे. कुणालाही लाच न देता पसंतीक्रमाने बदली मिळण्यासाठी समुपदेशन सुरू झाल्यामुळे अधिकारी वर्गाला सुखद धक्का बसला आहे.

कृषी सेवा गट-ब, महाराष्ट्र कृषी सेवा गट-ब (कनिष्ठ) व कृषी अधिकारी (जिल्हा परिषद) कनिष्ठ अशा राजपत्रित अधिकाऱ्यांच्या बदल्यांसाठी कृषी आयुक्तांनी शुक्रवारपासून (ता. २३) पुण्यात समुपदेशन प्रक्रिया सुरू केली आहे. पुणे कृषी महाविद्यालयाच्या आवारातील शिरनामे सभागृहात सुरू झालेल्या समुपदेशनासाठी पहिल्याच दिवशी राज्याच्या विविध भागांमधून कृषी अधिकारी हजर झाले.

पहिल्या दिवशी महाराष्ट्र कृषी सेवा गट-ब व गट-ब (कनिष्ठ) यांचे समुपदेशन झाले. शनिवारी (ता. २४) व रविवारी (ता. २५) पुन्हा गट-ब (कनिष्ठ) वर्गाचे तसेच जिल्हा परिषदेतील गट-ब कनिष्ठ राजपत्रित कृषी अधिकाऱ्यांचे समुपदेशन होणार आहे. ३१ मे २०२५ अखेर बदलीस पात्र असलेल्या कृषी अधिकाऱ्यांना समुपदेशनात सहभागी करून घेण्यात येत आहे.

बंद पडलेली समुपदेशन पद्धती कृषिमंत्र्यांसह कृषी सचिव विकासचंद्र रस्तोगी व कृषी आयुक्त सूरज मांढरे यांनी पुन्हा लागू केल्यामुळे कृषी विभागातील विविध संघटनांच्या पदाधिकाऱ्यांनी आनंद व्यक्त केला आहे.

मोफत बदलीसाठी दहा विकल्प

कृषी अधिकाऱ्यांच्या बदल्यांचा घोडेबाजार थांबविण्यासाठी समुपदेशनाची पद्धत लागू झाली होती. पूर्वी मंत्रालयातील लॉबीने पद्धतशीरपणे ही पद्धत बंद पाडली. त्यानंतर तत्कालीन कृषिमंत्री धनंजय मुंडे यांच्या काळात बदल्याचे थेट रेटकार्ड राज्यभर गाजले. आता कृषिमंत्री माणिकराव कोकाटे यांनी बदल्यांचे अधिकार स्वतःहून सोडले व प्रशासनाला नियमानुसार बदल्यांची सूट दिली.

त्यामुळे कृषी आयुक्तांनी पुन्हा समुपदेशन पद्धत लागू केली. या पद्धतीत बदलीपात्र अधिकाऱ्यांकडून दहा विकल्प घेतले जातात. त्यात पसंतीक्रम, प्राधान्यक्रम, पूर्वी केलेल्या सेवांची माहिती विचारात घेत प्रशासनाकडून अधिकाऱ्यांना पसंतीच्या ठिकाणी मोफत बदली दिली जाते. त्यासाठी आयुक्तांनी बदलीपात्र अधिकाऱ्यांची यादी, रिक्त पदे याची माहिती संकेतस्थळावर जाहीर केली आहे. या पारदर्शक कामकाजामुळे बदल्यांमधील घोडेबाजाराला यंदा काही प्रमाणात आळा बसणार आहे.