Nagar Crop Damage Update : मागील तीन दिवस जिल्ह्याच्या वेगवेगळ्या भागांत अवकाळी पावसाने (Unseasonal Rain) हजेरी लावली. वादळी वाऱ्यासह गारपिटीने गहू, ज्वारी, हरभरा, कांदा, टोमॅटोसह भाजीपाला पिकांचे नुकसान झाले.

आंबा, द्राक्ष, संत्री, मोसंबी, लिंबू फळबागांसह १३ हजार २०९ हेक्टरवरील पिकांचे नुकसान झाले. ३३२ घरांचे अंशतः नुकसान झाले, तर लहान-मोठी नऊ जनावरे दगावली.

नगर जिल्ह्यात ७ ते ९ एप्रिलदरम्यान जिल्ह्यामधील अनेक भागात अवकाळी पाऊस झाला. सोसाट्याच्या वाऱ्याने आंबा, द्राक्ष, संत्री, मोसंबी, लिंबू आदी फळबागांचे मोठे नुकसान झाले.

घरांचेही नुकसान झाले. वीज कोसळल्याने काही ठिकाणी वृक्षांनी पेट घेतला, तर काही ठिकाणी जनावरे दगावली. पारनेर, नगर, कर्जत, जामखेड, नेवासे, पाथर्डी, शेवगाव, राहुरी, संगमनेर आणि राहाता तालुक्यांत नुकसान झाले.

नेवासे तालुक्यात सर्वाधिक, म्हणजे चार हजार ३०० हेक्टरवरील पिकांचे नुकसान झाले. अकोले, श्रीरामपूर, श्रीगोंदे आणि जामखेड तालुक्यांत नुकसान झाले नाही. नेवासे ६२०, राहुरी १२५, नगर ४८ आणि कोपरगाव तालुक्यात १७ हेक्टरवरील पिकांचे ३३ टक्क्यांपेक्षा कमी नुकसान झाले आहे.

घरांचे नुकसान, जनावरांचा मृत्यू

पारनेर तालुक्याच्या उत्तर भागात अवकाळीचा तडाखा मोठ्या प्रमाणात बसला. १५३ घरांचे नुकसान झाले. नेवासे तालुक्यातील ८१ घरांचे नुकसान झाले. शेवगाव ३०, नगर २८, संगमनेर १८, राहुरी १०, पाथर्डी ७, तर राहाता तालुक्यातील एका घराचे नुकसान झाले.

अवकाळी पावसात वीज पडणे, झाडांच्या फांद्या अंगावर पडणे आणि गोठे पडल्याने नऊ जनावरे दगावली आहेत. जामखेड, कर्जत, नेवासे आणि शेवगाव तालुक्यांत प्रत्येकी एका मोठ्या जनावराचा मृत्यू झाला. नगर तालुक्यातील लहान पाच जनावरांचा मृत्यू झाला आहे. नगर ३, नेवासे २ आणि शेवगावमधील २ अशा ७ गोठ्यांचे नुकसान झाले.

तालुकानिहाय बाधित क्षेत्र (हेक्टरमध्ये)

नगर - १ हजार २२६, कर्जत १५६, कोपरगाव ४१४, नेवासे ४ हजार ३००, पारनेर २ हजार ४००, पाथर्डी २.८, राहुरी ६९८, संगमनेर ६००, शेवगाव २ हजार १९७, राहाता ४०५