Jalgaon News : खानदेशात गहू पीक मळणीवर येत आहे. तसेच उशिरा लागवड केलेल्या पिकात दाणे पक्व होत असून, पीक बऱ्यापैकी चांगले आहे. गव्हाची पेरणी खानदेशात यंदा कमी झाली आहे. पेरणी सुमारे २१हजार हेक्टरवर झाली आहे. जळगाव जिल्ह्यात १८ ते १९ हजार हेक्टरवर पेरणी अपेक्षित होती.

परंतु पेरणी सुमारे तीन ते साडेतीन हजार हेक्टरने कमी झाली आहे. तर धुळे व नंदुरबारात सुमारे सात ते आठ हजार हेक्टरवर पेरणी अपेक्षित होती. परंतु या दोन्ही जिल्ह्यांतही पेरणी ३० टक्क्यांनी कमी झाली आहे.

गव्हाचे दर मागील हंगामात कमी होते. यंदाही दरांबाबत अपेक्षा नव्हती. कारण गहू मोफत रेशन दुकानांत उपलब्ध होतो. दुसरीकडे पाऊसमान कमी असल्याने अनेक भागात कूपनलिका, विहिरींचे जलसाठे कमी झाले. गव्हास पाणी अधिक लागते. तसेच खते व अन्य खर्चही अधिक आहे. यामुळे यंदा अनेकांनी गहू पेरणी टाळली आहे.

पेरणी तापी, गिरणा, अनेर नदीच्या लाभक्षेत्रात झाली आहे. अनेक शेतकरी परंपरेनुसार केळी पिकाच्या बेवडसाठी गहू पेरणी करतात. यामुळे पेरणीत मोठी घट जळगाव जिल्ह्यात झालेली नाही. परंतु अनेकांनी गव्हाचे क्षेत्र कमी केले. तर काहींनी गहू टाळून हरभरा व ज्वारीची पेरणी केली. जळगाव जिल्ह्यात चोपडा, यावल, रावेर, पाचोरा या भागात गहू पेरणी बऱ्यापैकी आहे. परंतु अन्य भागात पेरणी कमी किंवा अल्प आहे. धुळ्यात शिरपूर आणि नंदुरबारात शहादा व तळोदा तालुक्यात गहू पीक आहे.

वेळेत पेरणीचा गहू पक्व

वेळेत किंवा नोव्हेंबरच्या पहिल्या, दुसऱ्या आठवड्यात पेरणी केलेल्या गहू पिकात दाणे पक्व होऊन ते मळणीवर आले आहे. दाणे कडक झाल्याने त्याचे सिंचन बंद करावे लागले आहे. कारण सिंचन पाट पद्धतीने केले जाते. त्यात सध्या वेगाचा वारा व पावसाळी वातावरण आहे. यात पीक आडवे होण्याची शक्यता अधिक असते.

पुढील आठवड्यात खानदेशात गव्हाची मळणी सुरू होईल. उशिरा पेरणी केलेल्या गहू पिकात दाणे पक्व होत आहेत. काही भागात जानेवारीतही पेरणी झाली असून, काहींचे पीक अद्याप निसवलेले नाही. अशा स्थितीतील पिकास आणखी दोन वेळेस पाणी द्यावे लागेल. यामुळे खानदेशात गव्हाची मळणी व आवक एप्रिलपर्यंत सुरू राहील, असेही दिसत आहे.