Paddy Threshing : रोह्यात झोडणी-मळणीची कामे खोळंबली

Roha News : हवामान खात्याने अवकाळी पाऊस पडण्याची शक्यता वर्तवली आहे. त्यात वातावरणात ढगाळ परिस्थिती निर्माण होत आहे. त्यामुळे रोहा ग्रामीण भागातील भातशेतीची झोडणी, मळणीची कामे खोळंबली आहेत.

दिवाळीनंतर साधारणपणे आठ ते दहा दिवसांमध्ये शेतीची झोडणी व मळणीची कामे उरकणे आणि नव्या हंगामातील पूर्व तयारी करून कामे करण्याची परंपरा आहे. परंतु यावर्षी दिवाळीत अवकाळी पाऊस आणि त्यानंतर ढगाळ वातावरण राहत आहेत. आताही कोणत्याही वेळी अवकाळी पाऊस पडण्याची भीती व्यक्त केली जाऊ लागली आहे.

त्यातच बंगालच्या उपसागरात वादळ निर्माण होण्याच्या पार्श्वभूमीवर अवकाळी पाऊस कोसळण्याची शक्यता हवामान खात्याने वर्तवली आहे. पाऊस कधीही कोसळू शकतो, ही भीती शेतकऱ्यांच्या मनामध्ये निर्माण झाली आहे. शेतमालाचे कोणतेही नुकसान होऊ नये,

यासाठी पुरेशी खबरदारी घेतली असून, कापणी केलेले भाताची मळणी करून साठवून ठेवले आहेत. तसेच अवकाळी पावसामुळे मळणीतील भात भिजू नये, यासाठी प्लास्टिकच्या कापडाने त्यांना झाकले आहेत.