Akola News : तणनाशकांना बाजारपेठेत असलेली मागणी पाहत अनेक कंपन्या रिंगणात उतरल्या आहेत. मात्र, यंदा अनेक शेतकऱ्यांनी फवारणी केल्यानंतरही तण तसेच उभे आहे. शिवाय फवारणी क्षेत्रातील पिकांची वाढही होत नसल्याच्या तक्रारी येत आहेत.

तणनाशकांबाबत मोठ्या प्रमाणात तक्रारींचा सूर गावोगावी उमटू लागला आहे. कृषी विभागाकडेही याबाबत लेखी तक्रारी शेतकरी देत आहेत. तर कंपन्यांचे विक्री प्रतिनिधी शेतकऱ्यांच्या भेटीगाठी घेऊन ही प्रकरणे जागेवर मिटवण्याचा प्रयत्नसुद्धा करीत आहेत.

निंदणाचा खर्च वाचण्यासाठी तसेच पीक तणमुक्त करण्यासाठी मागील काही वर्षात तणनाशकांचा वापर वाढला. किटकनाशकांप्रमाणेच तणनाशकांचीही एक मोठी बाजारपेठ तयार झाली आहे. हंगामाच्या तोंडावर विविध कंपन्यांकडून तणनाशकांच्या जाहिरातींचा भडीमार शेतकऱ्यांवर केला जातो. यामुळे कुठले तणनाशक वापरावे याचा संभ्रमही अनेकदा तयार होत असतो.

या वर्षी अनियमित पावसाने पेरण्याही भिन्न कालावधीत झालेल्या आहेत. यामुळे पिकांची अवस्था वेगवेगळी आहे. गेल्या काही दिवसात हलका ते मध्यम स्वरूपाचा पाऊस सातत्याने होत असल्याने पिकांमध्ये तणांचे प्रमाण वाढले.

त्यामुळे तणनियंत्रणासाठी शेतकरी तणनाशकांची फवारणी करत आहेत. बाजारपेठेत मोठ्या प्रमाणात तणनाशके उपलब्ध असून विक्रेत्यांच्या सल्ल्‍याने शेतकरी त्याची खरेदी करून फवारत आहेत.

या हंगामात तणनाशकांचा प्रभाव होत नसल्याच्या तक्रारी शेतकरी करीत आहेत. जळगाव जामोद तालुक्यात माहुली गावातील शेतकऱ्यांनी तालुका कृषी अधिकाऱ्यांकडे एका नामांकित कंपनीच्या तणनाशकाबाबत तक्रार दिली आहे.

सोयाबीन, तूर पिकात फवारणी करून १५ दिवसाचा कालावधी झाल्यावरही तण हिरवेगार उभे आहे. त्यामुळे तणनाशकाचा कुठलाच प्रभाव दिसून आलेला नाही, असे त्यात म्हटले आहे. कंपनीने शेतकऱ्यांना नुकसान भरपाई द्यावी, अशी मागणी करीत कृषी विभागाच्या गुणनियंत्रण अधिकाऱ्यांकडून तपासणीची मागणी या शेतकऱ्यांनी केली आहे.