Palghar News : तालुक्यात पावसाळा सुरू होण्यापूर्वी अनेक बाबींची तयारी शेतकऱ्यांसह नागरिक करत असतात. त्यात धान्य भरून ठेवणे, लाकूड फाटा गोळा करणे, सुकी मासळी साठवणूक करणे आदी कामांसाठी प्लॅस्टिक, ताडपत्रींचा मोठ्या प्रमाणात वापर करण्यात येत असतो. यंदा प्लॅस्टिक कागद आणि ताडपत्रीच्या दरात गेल्या वर्षीच्या तुलनेत ३५ टक्क्यांनी वाढ झाली आहे.

पावसापासून पिकांचा बचाव व्हावा. घरांना गळती लागून नुकसान होऊ नये. त्याचप्रमाणे शहरातही छोट्या-मोठ्या व्यापाऱ्यांनी मागून ठेवलेला विविध प्रकारचा साहित्याचा साठा, तयार करून ठेवलेले उत्पादन पावसात भिजू नये, याची खबरदारी घेण्यासाठी प्लॅस्टिक कागद आणि ताडपत्रींची खरेदी केली जाते. त्याच पार्श्वभूमीवर सध्या नागरिकांसह शेतकरी, उद्योजकांकडून दुकानांवर खरेदीसाठी गर्दी होत आहे.

त्यामुळे मागणीत ३० ते ४० टक्क्यांनी वाढ झाली आहे. आवक कमी आणि मागणी अधिक असल्याने दरातही काहीशी वाढ झालेली आहे. शेतकरी, नागरिक, व्यापारी आणि औद्योगिक क्षेत्रातील कर्मचाऱ्यांनी प्लॅस्टिक, कापड आणि ताडपत्री घेण्यासाठी गांधी चौक, एसटी स्टँड परिसरातील दुकानांवर गर्दी केली आहे. ग्रामीण भागातून अधिक मागणी आहे. शेतकऱ्यांचा त्यात अधिक समावेश आहे.

आतापासूनच खरेदी-विक्री सुरू झाल्याने विक्रेत्यांनी समाधान व्यक्त केले आले. प्लॅस्टिक कापडी विक्रीच्या सर्वच दुकाने ग्राहकांनी गजबजली आहेत. खासकरून रोल प्लॅस्टिकची सर्वाधिक विक्री होत आहे.

त्यापाठोपाठ ताडपत्रींची विक्री होत आहे. वाहनधारकांकडूनही प्लॅस्टिक आणि ताडपत्रीचे वाहन कव्हरची मागणी होत आहे. गेल्या वर्षीच्या तुलनेत सुमारे ३५ टक्क्यांनी दरवाढ झाली आहे. अवकाळी पावसामुळे वाढलेल्या मागणीच्या तुलनेत आवक कमी आहे. यातच कच्च्या मालाचे दर वाढले आहे.