Ghansawangi News : घनसावंगी तालुक्यात चार ते पाच दिवसांपासून पावसाची तुफान बॅटिंग सुरू आहे. या मुसळधार पावसामुळे तालुक्यातील नदी-नाले, ओढे यांना चांगले पाणी आले आहे. शेतातील पिके पाण्याखाली गेली आहेत.

चार दिवसांपासून संततधार पाऊस पडत असल्यामुळे चोवीस तासांत १०० मिलिमीटरपेक्षा जास्त पावसाची नोंद झाली आहे.

परिणामी परिसरातील जनजीवन विस्कळित झाले आहे. घनसावंगी तालुक्यात आतापर्यंत ५१४.८० मिलिमीटर पाऊस पडल्याची माहिती हवामान विभागातून देण्यात आली. रामसगाव, शेवता या भागांत ढगफुटीसदृश पावसामुळे नदी-नाल्यांना पाणी आले.

त्याचबरोबर मच्छिंद्रनाथ चिंचोली, घनसावंगी, मांदळा, बोडखा यांसह अनेक गावांमध्ये जोरदार पाऊस झाल्याचे वृत्त आहे. दरम्यान, शेतकऱ्यांनी मागील आठवड्यापासून शेतातील पिकांना खत देणे, कीटकनाशकांची फवारणी, खुरपणी, औताच्या पाळ्या अशी अनेक कामे करून ठेवली होती.