Nagpur News: केंद्र सरकारने २०२५-२६ या वर्षाकरिता खरीप हंगामातील १४ विविध शेतीमालांसाठीचे हमीभाव बुधवारी (ता. २८) जाहीर केले आहेत. परंतु हा केवळ आकड्यांचा खेळ असून महागाईच्या तुलनेत हमीदरात केलेली वाढ ही तुटपुंजी असल्याचा आरोप शेतकरी नेते विजय जावंधिया यांनी केला आहे.

श्री. जावंधिया म्हणाले, की केंद्र सरकारकडून जाहीर करण्यात आलेल्या हमीभावामध्ये मुगाच्या हमीदरात गेल्या वर्षीच्या तुलनेत अवघी एक टक्‍का वाढ केली आहे. २०२४-२५ या वर्षात मुगाची किंमत ८६८२ रुपये होती. २०२५-२६ या वर्षात ८७६८ रुपये असा हमीभाव मुगाला मिळणार आहे. तूर, उडीद यांच्या हमी किमतीत अवघी सहा ते आठ टक्‍के इतकीच वाढ जाहीर केली आहे. तुरीला यापूर्वी ७५५० रुपयांचा हमीभाव असताना यंदाच्या हंगामात तो ८००० रुपये करण्यात आला आहे.

बाजारात सद्यःस्थितीत ६८०० ते ७००० रुपये याप्रमाणेच तुरीचे व्यवहार होत आहेत. सोयाबीनचे देखील असेच असून, ४८९२ रुपये क्‍विंटलचा हमीभाव याला जाहीर करण्यात आला होता. या वर्षी त्यात ८.५ टक्‍के वाढ करून हा दर ५३८२ असा केला आहे. पंतप्रधान नरेंद्र मोदी यांनी विधानसभा निवडणूक काळात सोयाबीनला ६००० रुपयांचा दर देण्याचे जाहीर केले होते.

असे असताना बाजारात सोयाबीनचे व्यवहार ४००० रुपयांनी होत आहेत. कापसाचेही तसेच असून मध्यम धाग्याकरिता ७१२१ रुपये दर होता त्यात वाढ करून तो आता ७७१० रुपये केला आहे. लांब धागा कापूस ७५२१ रुपयांवरून ८००० रुपये क्‍विंटल केला आहे. कापसाला देखील बाजारात ७००० ते ७१०० रुपये इतकाच दर मिळाला.

पीएम कार्यालयाचा खर्च किती पटीने वाढला?

२०१४ ते २०२४-२५ या दहा वर्षांत शेतीमालाच्या हमीभावात ८० ते १०० टक्‍के वाढ झाली आहे, असे मोदी सरकारकडून जाहीर करण्यात आले आहे. त्याचवेळी पंतप्रधान कार्यालयाचा खर्च किती पटीने वाढला हे देखील त्यांच्या कार्यालयाकडून जाहीर करण्यात यावे, अशी मागणी देखील श्री. जावंधिया यांनी केली आहे.