Nashik News : गेल्या आठवडाभरापासून नाशिक, इगतपुरी त्र्यंबकेश्वर तालुक्यात धरणांच्या पाणलोट क्षेत्रात, तसेच नद्यांच्या परिसरात झालेल्या दमदार पावसामुळे गंगापूर आणि दारणा धरण समूहातून गोदावरीत मोठ्या प्रमाणावर विसर्ग सोडण्यात आला होता.

परिणामी निफाड तालुक्याच्या गोदाकाठ भागात रविवारी (ता. २५) पहाटेपासून पूरस्थिती निर्माण झालेली होती. मंगळवारी उशिरापर्यंत गोदावरी नदीने धोक्याची पातळी ओलांडलेली होती. तिसऱ्या दिवसानंतर हा पूर ओसरल्याने दिसून आले.

२०१६ मध्ये या काळातच पुराच्या पाण्याने गोदाकाठ भागात थैमान घातले होते. त्यानंतर २०१७-१८, २०१९ या वर्षीही या दरम्यानच पूरस्थिती निर्माण झाली होती. आता २० दिवसांत दोन वेळा पूरस्थिती निर्माण झाल्याने नागरिकांमध्ये धास्ती आहे.

गोदावरीच्या पात्रात पाण्याची आवक वाढल्याने नदीने पात्र सोडले होते. त्यामुळे चाटोरी, नागापूर, सायखेडा, चांदोरी, शिंगवे, करंजगाव, गोंडेगाव, चापडगाव, मांजरगाव या गावांच्या नदीपात्राच्या शेजारी शिवारात पाणी घुसले होते.

भाजीपाला, सोयाबीन पिके पाण्याखाली गेल्याने शेतकऱ्यांचे नुकसान झाले आहे. गोदापात्र ओलांडल्याने नदी काठावरील बहुतांश वीटभट्ट्या पाण्याखाली गेल्याने वीटभट्टी व्यावसायिकांचे मोठे नुकसान झाले आहे.