Washim News : जिल्ह्यात मागील काही दिवसांत झालेला मॉन्सूनोत्तर पाऊस व ढगाळ वातावरणामुळे रब्बी पिकांवर विविध रोगांचा प्रादुर्भाव झाला आहे. बुरशीजन्य रोग वाढले. हरभरा पिकात मर रोग वाढल्यामुळे पीक खराब होत आहे.

पिकाची शाश्वती दिसत नसल्याने वनोजा गावात शेतकऱ्याने आठ एकरांतील हरभऱ्याचे पीक मोडून काढले. वाशीम जिल्ह्यातील मंगरूळपीर तालुक्यातील वनोजा येथील शेतकरी नरेंद्र राऊत यांच्या गट नं २५५/१ असलेल्या शेतीमधील हरभऱ्याचे पीक २७ व २८ नोव्हेंबर रोजी झालेल्या पावसामुळे खराब झाले आहे.

यामुळे त्यांचे मोठ्या प्रमाणात नुकसान होऊन उत्पादन येण्याची शक्यता नसल्याचे पाहून राऊत यांनी आपल्या ८ एकर शेतातील पिकावर ट्रॅक्टर फिरवण्याचा निर्णय घेतला. त्यांनी पेरणीसाठी बियाणे, खत, पेरणी, मशागतीवर मोठा खर्च करत मोठ्या आशेने रब्बी हंगामात हरभरा पिकाची पेरणी केली होती. मात्र पाऊस व किडींनी सर्व हिरावून नेले. शासनाने पंचनामे करून भरपाई देण्याची मागणी शेतकऱ्यांमधून केली जात आहे.