Solapur News : भारतात १५० पेक्षा कमी दुर्मिळ माळढोक पक्षी आहेत, ज्यापैकी ज्यादा संख्या राजस्थानात आहे. राजस्थान वन विभागाच्या जैसलमेरमधील डेझर्ट नॅशनल पार्कमध्ये केलेल्या एका प्रयोगात कृत्रिम गर्भाधारणेद्वारे माळढोकचे जगातील पहिले पिलू जन्मले आहे.

केंद्र शासन व भारतीय वन्यजीव संस्थेच्या संयुक्त विद्यमाने राजस्थानात माळढोक पक्ष्यांचे कृत्रिम प्रजनन केंद्र सुरू केले आहे. तेथेच नव्या तंत्राचा वापर करून कृत्रिम गर्भधारणेतून माळढोकचे पिलू जन्माला आले.

लहान आणि गडद ठिपक्यांसह तपकिरी रंगाचे हे पिल्लू असून, सध्या ते एक महिने वयाचे आहे. कृत्रिम गर्भाधारणेद्वारे जन्मलेले हे जगातील पहिले पिलू आहे. माळढोक पक्ष्यांची संख्या वाढवण्यासाठी ही मोठी आनंदाची बातमी आहे.

कृत्रिम प्रजनन केंद्राचे काम

मुख्यतः केंद्र सरकार, राजस्थान सरकार आणि वन विभागाच्या सहकार्याने बस्टर्ड पुनर्प्राप्ती कार्यक्रमांतर्गत जैसलमेरमध्ये ग्रेट इंडियन बस्टर्ड कृत्रिम प्रजनन केंद्राची स्थापना करण्यात आली. ग्रेट इंडियन बस्टर्डची लोकसंख्या वाढवणे, हा या कार्यक्रमाचा उद्देश आहे.

यातील डब्ल्यू. आय. आय.च्या शास्त्रज्ञांना अबुधाबी येथील इंटरनॅशनल फंड फॉर हौबारा कन्झर्वेशन येथे प्रशिक्षण देण्यात आले होते. त्यानंतर या शास्त्रज्ञांनी जैसलमेरमध्ये कृत्रिम गर्भाधारणेद्वारे माळढोकच्या प्रजननाचा हा कार्यक्रम राबवला आणि त्यात यशही मिळाले, असे मुख्य वन्यजीव वॉर्डन पी. के. उपाध्याय यांनी सांगितले.