Jalgaon News : शेतकऱ्यांनाच आपल्या पीक पेरणीचा अधिकार देण्यासंबंधी ई पीक पाहणी उपक्रम सुरू आहे. पण यास खरिपाच्या सुरुवातीसही कमी प्रतिसाद मिळत आहे. तसेच अॅप सर्व्हर डाउनमुळे कार्यरत होत नसल्याची स्थिती आहे. परिणामी ई पीक पाहणीदेखील ठप्प आहे.

सध्या केळी लागवड सुरू आहे. पूर्वहंगामी कापूस लागवड पूर्ण झाली आहे. परंतु या लागवडीच्या नोंदी ऑनलाइन किंवा सातबारावर दिसत नसल्याची स्थिती आहे. ई पीक पाहणी अॅण्ड्रॉइड मोबाइलच्या मदतीने ई पीक पाहणी अॅपवरून करावी लागते. हंगामातील पीक पेऱ्यांबाबत अनेक शेतकऱ्यांना नोंदणी करायची आहे. परंतु ही नोंदणी करताना नेटवर्क, डाटा हवा असतो. स्मार्ट फोन अनेकांकडे नाहीत.

यामुळे पेरा नोंदणीस कमी प्रतिसाद मिळत आहे. अनेक शेतकऱ्यांनी आपल्या मोबाइलमध्ये अॅप डाउनलोड केले आहे. त्यांचा खाते क्रमांक व चार अंकी सांकेतांक आहे. हा खाते क्रमांक व सांकेतांकची नोंद केल्यानंतर अॅप सुरू होते. पुढे पीक पाहणीसंबंधी कार्यवाही होते. परंतु अॅप सांकेतांक नोंदणी केल्यावरही कार्यरत होत नाही, अशाही तक्रारी आहेत.

शेतकरी याबाबत तांत्रिक समस्या घेऊन तलाठी कार्यालयात जात आहेत. परंतु तलाठी याबाबत दुरुस्ती किंवा इतर कार्यवाहीबाबत असमर्थता दाखवीत आहेत. यासंबंधीची कार्यवाही प्रशासनातील संबंधित करू शकतात. परंतु दुरुस्तीच होत नसल्याने पीक पाहणीची नोंद अॅपवर होत नसल्याची स्थिती आहे. खरिपातील पेरणी आटोपली आहे.

काहींनी पेरणी नोंदविली, परंतु पेरा नोंद अद्यापही उताऱ्यावर दिसत नाही, असेही काही शेतकऱ्यांचे म्हणणे आहे. कृषी विभागाची मदत पेरणीसंबंधीच्या आकड्यांबाबत महसूल प्रशासनास घ्यावी लागत आहे. ई पीक पाहणीसंबंधीचे काम महाआयटीच्या पुणे येथील कार्यालयातून हाताळले जाते. यातच कुठेही ई पीक पाहणीसंबंधी अधिकृत अधिकाऱ्याची नियुक्ती झालेली नाही.