Nanded News : जागतिक हवामान संस्थेच्या निकशाप्रमाणे स्वयंचलित हवामान केंद्राची उंची २ मीटरऐवजी १० मीटर करण्यात यावी. त्यामुळे केंद्र सरकारच्या हवामान माहिती नेटवर्क डेटा सिस्टिम प्रकल्पांतर्गत ग्रामपंचायत व महसूल मंडळ स्तरावरील स्वयंचलित हवामान केंद्राची उंची १० मीटर करण्यात यावी, अशी मागणी स्वाभिमानी शेतकरी संघटनेकडून जिल्हाधिकाऱ्यांकडे केली आहे.

नांदेड जिल्ह्यात नैसर्गिक आपत्तीमुळे केळी पिकांचे मोठ्या प्रमाणात झालेले नुकसान आणि पीकविमा कंपनीने शेतकऱ्यांचे फेटाळलेले दावे, या पार्श्‍वभूमीवर भविष्यात केळी उत्पादक शेतकऱ्यांना पीकविम्याच्या रकमेची भरीव नुकसान भरपाई मिळण्याच्या दृष्टीने स्वाभिमानी शेतकरी संघटनेचे जिल्हाध्यक्ष हनुमंत पाटील राजेगोरे, काँग्रेसचे मुदखेड तालुकाध्यक्ष प्रताप देशमुख बारडकर, प्रा. संदीप देशमुख बारडकर, बालाजी हेंद्रे, अनुराग आठवले यांनी जिल्हाधिकारी राहुल कर्डिले यांची भेट घेऊन ही मागणी केली आहे.

केंद्र सरकारच्या हवामान माहिती नेटवर्क डेटा सिस्टिम प्रकल्पांतर्गत ग्रामपंचायत स्तरावर स्वयंचलित हवामान केंद्र बसविणेबाबत शासन निर्णय निर्गमित करण्यात आला आहे. या प्रकल्पाचा कालावधी पाच वर्षे असून त्यास दोन वर्षांपर्यंत मुदतवाढ देता येणार आहे. या केंद्राच्या उभारणीसाठी राज्य शासनाने जागा उपलब्ध करून द्यावयाची आहे.

जागा ही शासकीय असावी. हा प्रकल्प कार्यान्वित करण्याची प्रक्रिया शासन निर्णय अन्वये करावयाची असल्याने प्रकल्पांतर्गत ग्रामपंचायत स्तरावर स्वयंचलित हवामान केंद्र बसविण्याकरिता तांत्रिक निकषानुसार योग्य जागा उपलब्ध करून देणे आवश्यक आहे.

या प्रकल्पांतर्गत स्वयंचलित हवामान केंद्र स्थापित करताना जागतिक हवामान संस्थेच्या निकषाप्रमाणे स्वयंचलित हवामान केंद्राची उंची २ मीटरच्या ऐवजी, १० मीटर करण्यात यावी. जागतिक हवामान संस्थेनुसार १० मीटर उंची ही मोठ्या क्षेत्रांसाठी योग्य मोजणी करण्यासाठी एक चांगला पर्याय मानला जातो.

त्यामुळे जागतिक हवामान संस्थेच्या निकषानुसार केंद्राच्या प्रकल्पांतर्गत ग्रामपंचायत व महसुल मंडळ स्तरावरील स्वयंचलित हवामान केंद्राची उंची १० मीटर करण्यात यावी, अशी मागणी निवेदनात करण्यात आली आहे.