Kolhapur News : गतवर्षीच्या पावसाने मध्यम व लघू पाटबंधारे तलाव तुडुंब भरले. त्याचा परिणाम ऊस क्षेत्र वाढण्यावर झाला आहे. तालुक्यात साधारण दोन हजार हेक्टरमध्ये ऊस वाढला असून त्याप्रमाणात उत्पादन वाढणार आहे. या पिकाच्या वाढीने खरीप हंगामातील भात, भुईमूग व इतर पिकांच्या लागवडीत घट येण्याचा अंदाज कृषी विभागाने वर्तविला आहे.

तालुक्यात प्रमुख नगदी पीक म्हणून ऊस तर दुसऱ्या क्रमांकाचे नगदी पीक सोयाबीनला प्राधान्य दिले जाते. उसाच्या बरोबरीने सोयाबीनच्या क्षेत्राने मजल मारली आहे. त्यानंतर भात, भुईमूग, मका, ज्वारी आदी पिकांचा क्रमांक लागतो.

२०२३ मधील पावसाचे प्रमाण कमी राहिल्याने गतवर्षी उसाचे क्षेत्र स्थिर राहिले. शिवाय २०२४ मधील अतिपावसाने उसाच्या उत्पादनात कमालीची घट आली. क्षेत्र वाढले पण उत्पादन घटल्याने यंदा कारखान्यांचे गाळपही २५ ते ३५ टक्क्यांनी कमी झाले. दरम्यान, कारखानदारांचे लक्ष आता पुढील गळीत हंगामावर केंद्रित झाले आहे.

दरम्यान, गतवर्षी जोरदार पावसाने चित्री, आंबेओहोळ, उचंगी, सर्फनाला या मध्यम प्रकल्पासह तालुक्यातील वैरागवाडी, नरेवाडी, तेरणी, शेंद्री, करंबळी, कुमरी, येणेचवंडी हे लघू प्रकल्प शंभर टक्के भरले. नव्या ऊस लागवडीला हे मुबलक पाणी उपयुक्त ठरले.

परिणामी या लघू पाटबंधारे प्रकल्पाच्या कार्यक्षेत्रात बहुतांश ठिकाणी, हिरण्यकेशी व घटप्रभा नदीच्या काठावर तसेच उचंगीच्या तारओहोळ तर आंबेओहोळच्या ओढ्याच्या काठावरील क्षेत्रात नवीन उसाची लागवड वाढली आहे. परिणामी, उसाच्या उत्पादनात वाढ होणार आहे. शेतकऱ्यांच्या दृष्टीने या वाढलेल्या उसाने आर्थिक गोडवाही वाढीस मदत मिळणार आहे.

तोडणी व वाहतूकदारांतही वाढलेल्या ऊस क्षेत्रामुळे आनंदाचे वातावरण असले तरी मॉन्सूनच्या लहरीपणावरही हा आनंद किती द्विगुणित होणार हे ठरणार आहे. तालुक्यात उसाचे सरासरी एकरी उत्पादन २५ ते ३५ टनांपर्यंत असले तरी यापेक्षा अधिक उत्पादन घेणारे शेतकरी दरवर्षी वाढत आहेत. त्याचा परिणाम उत्पादन वाढीवरही होत आहे.