Hingoli News : हिंगोली जिल्ह्यात यंदा (२०२५ ) जून महिन्यात वादळी वारे, पावसामुळे सर्व तालुक्यातील ३ हजार २४७ शेतकऱ्यांच्या जिरायती, बागायती, फळपिके मिळून एकूण १ हजार ६११.३७ हेक्टर क्षेत्रावरील पिकांचे ३३ टक्के पेक्षा जास्त नुकसान झाले.

शेती पिकांच्या नुकसानीपोटी बाधित शेतकऱ्यांना २ हेक्टर मर्यादेत आर्थिक मदतीसाठी आवश्यक ३ कोटी ६० हजार ४५ रुपये निधी वितरित करण्यास राज्य शासनाने बुधवारी (ता. ६) मंजुरी दिली आहे.

हिंगोली जिल्ह्यात यावर्षी ९ आणि १० जून रोजी वादळी वाऱ्यासह पाऊस झाला.त्यामुळे जिल्ह्यातील सर्व ५ तालुक्यातील शेतकऱ्यांच्या जिरायती, बागायती, फळपिकांचे अतोनात नुकसान झाले.

वादळी वाऱ्यामुळे कळमनुरी व वसमत तालुक्यातील घड काढणीस आलेल्या केळी बागांतील झाडे मोडून पडल्याने केळी उत्पादकांचे अतोनात नुकसान झाले. भाजीपाला तसेच आंबा आदी फळपिकांना देखील वादळाचा मोठा फटका बसला.

जिरायती पिकांचे सेनगाव तालुक्यात ११ हेक्टर नुकसान झाले आहे. बागायती पिकांचे कळमनुरी तालुक्यातील १.३० हेक्टर, औंढा नागनाथ तालुक्यातील १.०५ हेक्टर, सेनगाव तालुक्यातील ८ हेक्टर मिळून एकूण १०.३५ हेक्टर नुकसान झाले.

फळपिकांचे कळमनुरी तालुक्यातील १ हजार ४९.३० हेक्टर, वसमत तालुक्यातील ५२८.४५ हेक्टर,औंढा नागनाथ तालुक्यातील ११.८२ हेक्टर, सेनगाव तालुक्यातील १ हेक्टर मिळून एकूण १ हजार ५९०.०२ हेक्टर नुकसान झाले आहे, असे महसूल विभागाच्या सूत्रांनी सांगितले.