Nagpur News : नानाजी देशमुख कृषी संजीवनी प्रकल्प (पोकरा) ची दुसऱ्या टप्प्यात अंमलबजावणी केली जाणार आहे. त्या पार्श्‍वभूमीवर बुधवारी (ता.२४) जागतिक बॅंक तसेच रिझर्व्ह बॅंक ऑफ इंडियाचे समन्वयक त्यासोबतच पोकरा प्रकल्प संचालक परिमल सिंह यांच्या उपस्थितीत प्रकल्पात समावेशित घटकांशी संवाद साधत त्यांच्या अपेक्षा जाणून घेण्यात आल्या.

हवामान बदलाच्या पार्श्‍वभूमीवर त्याला पूरक शेती प्रकल्प राबविण्यावर भर दिला जात आहे. पहिल्या टप्प्यातील प्रकल्पांतर्गंत खारपाणपट्ट्यातील गावांमध्ये विविध उपचारांवर भर देण्यात आला. जून २०२४ अखेर पहिल्या टप्प्यातील प्रकल्पाची मुदत संपुष्टात आली. त्यानंतर आता दुसऱ्या टप्प्यात या प्रकल्पाची अंमलबजावणी केली जाणार आहे.

त्या पार्श्‍वभूमीवर प्रकल्पाशी संबंधित शेतकरी व विविध घटकांशी संवाद साधत त्यांना अपेक्षित उपक्रम राबविण्यावर भर देण्याचे प्रस्तावित करण्यात आले आहे. पोकराचे प्रकल्प संचालक परिमल सिंह, वनामती संचालक डॉ. मिताली सेठी, जागतिक बॅंकेचे टास्क टिम लिडर रंजन समंतराय, कृषी तज्ज्ञ सौम्या श्रीवास्तव,

आर्थिक सल्लागार तनुजा माथुर, वातावरण अभ्यासक वनिथा कौम्यु, अर्थशास्त्रज्ञ मानसी विद्यासागर फडके, प्रकल्प समन्वयक गीता ॲलेक्‍स, विकास कानुनगो, जमीन आरोग्य तज्ज्ञ विजय कोळेकर, कृषी अभियांत्रिकी शाखेचे सागर खटकाळे, डॉ. राजुल पंत, विभागीय कृषी सहसंचालक शंकर तोटावार, जिल्हा अधीक्षक कृषी अधिकारी रवींद्र मनोहरे, अर्चना कडू यांचा पथकात समावेश होता.

पथकाने केंद्रिय कापूस संशोधन संस्थेला भेट दिली. या वेळी संस्थेचे संचालक डॉ. वाय.जी. प्रसाद यांनी जागतिक आणि भारतीयस्तरावरील कापसाची उत्पादकता, भारतात कापूस उत्पादकता वाढीसाठी अपेक्षित तंत्रज्ञान याविषयी माहिती दिली. त्यानंतर डॉ. मणिकंदन यांनी बायोचार निर्मितीविषयक तंत्रज्ञानाचे प्रात्यक्षिक सादर केले.

जमीन आरोग्य जपण्यासाठी बायोचारचे महत्त्वही त्यांनी सांगितले. शेतातील वेस्ट जळणार नसल्याने त्यातून पर्यावरण संरक्षण होईल. त्यामुळे पोकराच्या दुसऱ्या टप्प्यात बायोचार वापराला प्रोत्साहन देण्यात येणार आहे.