Latur News : लातूर जिल्ह्यात सततच्या पावसाचा फटका खरीप हंगामातील सर्वच पिकांना बसला असून काही भागात पिकांची वाढ खुंटली तर काही पिकांची नाहक मोठी वाढ झाली आहे. काही पिकांना किडी व अळींच्या प्रादुर्भावाने घेरले असून पिकांची परिस्थिती बिकट आहे. या स्थितीत शेतकरी हवालदिल झाली असून पिकांना सावरण्यासाठी तो हतबल झाला आहे.

यंदा वेळेवर पावसाला सुरुवात झाल्यामुळे खरीप हंगामातील पिकांच्या पेरण्याही वेळेवर झाल्या. पिकांची उगवण चांगली झाली. मात्र, गेल्या महिनाभरापासून ढगाळ वातावरण, अपुरा सूर्यप्रकाश व सततच्या पावसामुळे पिके संकटात सापडली असून काही भागात पिकांची वाढ खुंटली तर काही भागात मोठी वाढ होऊन त्याचा परिणाण सोयाबीनला कमी फुले येण्यात झाला आहे.

पाणी साचत असलेल्या ठिकाणी कापूस व सोयाबीनची वाढ खुंटली आहे. चांगल्या वाढलेल्या पिकांवर मोठ्या प्रमाणात उंट अळी, तंबाखूवरील पाने खाणारी अळी, कापूस व मुगावर मावा व तुडतुड्यांचा प्रार्दुभाव झाला असून येलो मोझॅकमुळे सोयाबीन पीक पिवळे पडत आहे. यामुळे सोयाबीन हातचे जाण्याची भीती शेतकऱ्यांत आहे.

पिकांवर फवारणीसाठी महागड्या कीटकनाशकांची खरेदी करण्यापासून त्यांच्या फवारणीसाठी मजूर मिळत नसल्याने शेतकरी हतबल झाले आहेत. हंगाम संपत आल्यानंतर कृषी विभागाने बॅटरीवरील फवारणी यंत्रांसाठी शेतकऱ्यांकडून अर्ज मागवले असून आता महाडीबीटी पोर्टलही हँग होत असल्याने ऑनलाइन अर्ज करताना शेतकऱ्यांची कसरत होत आहे. या स्थितीत कृषी अधिकारी व कर्मचाऱ्यांनी शेतकऱ्यांना दिलासा देण्यासाठी पुढे येण्याची गरज आहे.