Pune News: सोयाबीन खरेदीसाठी मुदत सहा फेब्रुवारीपर्यंत मुदतवाढ देण्यात आली आहे. मात्र, भारतीय राष्ट्रीय कृषी सहकारी विपणन महासंघ (नाफेड) मार्फत खरेदी करण्यात येत असलेल्या सोयाबीनची खेड तालुक्यात बारदाण्याअभावी मुदतीपूर्वीच खरेदी बंद करण्यात आली आहे. त्यामुळे शेतकऱ्यांकडून या विरोधात संताप व्यक्त करण्यात असून ही खरेदी तातडीने करण्यात यावी, अशी मागणी करण्यात येत आहे.

तालुक्यात सोयाबीनचे मोठ्या प्रमाणात क्षेत्र आहे. त्यासाठी सोयाबीन खरेदी केंद्र बाजार समितीजवळ खरेदी विक्री संघ येथे सुरू करण्यात आले होते. परंतु या खरेदीसाठी ३१ जानेवारी ही अंतिम मुदत होती.

त्यानंतर शासनाने त्यात वाढ करून ६ फेब्रुवारीपर्यंत वाढविली होती. त्यानुसार खरेदी केंद्रावर बऱ्यापैकी सोयाबीन खरेदी केली आहे. परंतु अजूनही तालुक्यातील ३० ते ४० शेतकरी या खरेदीपासून वंचित राहिले आहेत. त्याबाबत शेतकऱ्यांनी केंद्राचे सचिव नाना टाकळकर यांच्याशी संपर्क साधला, त्यावेळी त्यांनी नोंदणी केलेल्या शेतकऱ्यांचा सर्व माल घ्यावा अशी इच्छा आहे.

परंतु ‘नाफेड’कडून बारदाना मिळत नाही. त्यामुळे ही खरेदी बंद करण्यात आली आहे. आता मुदत संपत आल्यामुळे शेतकरीही अडचणीत येत असून नाफेडने तातडीने बारदाना उपलब्ध करून देऊन ही खरेदी करावी, अशी मागणी आळंदी देवाची येथील तुळशीराम रानवडे यांनी केली आहे.