Sangli News : जिल्ह्यात जूनमध्ये समाधानकारक पाऊस झाला. त्यामुळे शेतकऱ्यांनी खरीप हंगामातील पेरणी केली असून गत आठवड्यापर्यंत १ लाख २ हजार ८७६ हेक्टरवर म्हणजे ४० टक्के पेरणी झाली आहे. सोयबीन, भात ही पिके वाढीच्या अवस्थेत आहेत. मात्र, गेल्या दहा ते बारा दिवसांपासून पावसाने उघडीप दिली असल्याने शेतकऱ्यांना पावसाची प्रतीक्षा आहे.

जिल्ह्यात १ ते २८ जून या काळात १६ दिवस पावसाने हजेरी लावली असून २१५ मिलिमीटर पाऊस झाला. सर्वसाधारण पावसाच्या तुलनेत १६७ टक्के पाऊस झाला आहे. सर्वदूर पेरणी योग्य पाऊस झाल्याने शेतकऱ्यांनी खरीप हंगामातील पिकांची पेरणी सुरू केली.

खरीप हंगामाचे सरासरी क्षेत्र २ लाख ५५ हजार ९८४ हेक्टर क्षेत्र असून १ लाख ०२ हजार ८७६ हेक्टरवर पेरा झाला आहे. जत तालुक्यात सर्वाधिक पेरणी झाली आहे. तर तासगाव तालुक्यात सर्वांत कमी म्हणजे ६९६ हेक्टरवर पेरा झाला आहे.

जिल्ह्यात बहुतांश भागात जोरदार पाऊस पडला असल्याने पेरणीसाठी अजूनही वाफसा आला नाही. त्यामुळे पूर्व मशागतीसह पेरणीची कामे खोळंबली आहेत. शिराळा तालुक्यात धूळ वाफ भात पेरणी आटोपली असून भात लागणीसाठी ८० हेक्टरवर शेतकऱ्यांनी रोपे तयार केली आहेत. सोयाबीन, भात, उदीड, मूग ही पिके वाढीच्या अवस्थेत आहेत. जिल्ह्यात गेल्या दहा ते बारा दिवसांपासून पावसाने उघडीप दिली आहे.

तालुकानिहाय खरीप हंगामातील पेरणी दृष्टिक्षेप

तालुका क्षेत्र (हेक्टरमध्ये)

मिरज १,९४९

जत ५३,२३५

खानापूर २,९११

वाळवा १३,६७६

तासगाव ६९६

शिराळा १४,६१८

आटपाडी ४,२२६

कवठेमहांकाळ ५,०८५

पलूस ७५०

कडेगाव ५,७२९

एकूण १,०२,८७६