Solapur News: श्रीमंत घराण्यात जन्माला येऊनदेखील सिद्धाराम म्हेत्रे यांच्यात कधीही श्रीमंतीचा दर्प आला नाही. त्यांच्यात अहंकार आला नाही, ते कायम जमिनीवर राहिले, तर अनेक लोक वडिलांच्या नावावर बढाया मारतात, फुशारक्या मारतात, असा टोला शिवसेनेचे नेते, राज्याचे उपमुख्यमंत्री एकनाथ शिंदे यांनी गुरुवारी (ता. ५) शिवसेनेचे (उद्धव बाळासाहेब ठाकरे गट) प्रमुख उद्धव ठाकरे यांना नाव न घेता लगावला.

राज्याचे माजी मंत्री व काँग्रेसचे माजी आमदार सिद्धाराम म्हेत्रे आणि त्यांचे बंधू शंकर म्हेत्रे यांनी उपमुख्यमंत्री शिंदे यांच्या उपस्थितीत शिवसेनेत प्रवेश केला. त्या वेळी अक्कलकोट येथे आयोजित जाहीर सभेत उपमुख्यमंत्री शिंदे बोलत होते. या वेळी मंत्री दादा भुसे, मंत्री संजय राठोड, विधान परिषद उपसभापती नीलम गोऱ्हे आदी उपस्थित होते.

उपमुख्यमंत्री शिंदे म्हणाले, की सिद्धाराम म्हेत्रे आणि त्यांचे बंधू शंकर म्हेत्रे ही राम-लक्ष्मणाची जोडी आहे. म्हेत्रे परिवाराला मोठी सामाजिक पार्श्‍वभूमी आहे. त्यांचे वडील सातलिंग्गपा म्हेत्रे इथले मोठे प्रस्थ होते.

म्हेत्रे परिवाराने कधी जात, धर्म, पक्ष पाहिला नाही, आलेल्या माणसाचे काम केले. त्यामुळे इथल्या हिंदू-मुस्लिम बांधवांचा म्हेत्रे परिवाराला कायम पाठिंबा राहिला आहे. आज सिद्धारामजी यांनी काँग्रेसचा हात सोडून शिवसेनेचा भगवा हाती घेतला आहे. जिथे दिशा नाही तिथे दशा झाली, अशी टीका श्री. शिंदे यांनी काँग्रेसवर केली.

सिद्धाराम म्हेत्रे अनुभवी आहेत. त्यांच्या नावात राम आहे. ते शिवसेनेत आल्याने आता सोलापूर, अक्कलकोट, दुधनीचे भविष्य बदलल्याशिवाय राहणार नाही, असा विश्‍वास त्यांनी व्यक्त केला. स्थानिक स्वराज्य संस्थांच्या निवडणुकीत गाव तेथे शाखा, यानुसार काम करण्याचे आवाहन त्यांनी कार्यकर्त्यांना केले.