Solapur News : राज्यात भाजीपाल्यासह कांदा लिलावात आघाडीवर असलेल्या सोलापूर कृषी उत्पन्न बाजार समितीने आता आणखी ११ नव्या शेती उत्पादनांचे लिलाव नियमनाखाली आणण्याचा महत्त्वपूर्ण निर्णय घेतला आहे. यामध्ये रेशीम कोष, ड्रॅगन फळ, जांभूळ, कच्चा खजूर, किव्ही, आलु बुखार, पेर, काळी मैना, बीट, बिन्स आणि तांदूळसा भाजी यांचा समावेश आहे.

बाजार समितीने २१ जुलै रोजी अधिसूचना प्रसिद्ध करून या नव्या उत्पादनांना नियमनाखाली आणले असून, त्यामुळे यापुढे या उत्पादनांच्या खरेदी-विक्री व्यवहारांमध्ये शेतकऱ्यांची फसवणूक होणार नाही. यामुळे शेतकऱ्यांना त्यांच्या उत्पादनांचा योग्य दर मिळवून देण्यासाठी बाजार समिती अधिक जबाबदार राहणार आहे.

याबाबत बोलताना बाजार समितीचे सभापती दिलीप माने यांनी दिलेल्या माहितीनुसार, "या निर्णयामुळे सोलापूरसह शेजारच्या जिल्ह्यांतील शेती उत्पादनांना नवसंजीवनी मिळणार आहे. विशेषतः रेशीम कोषाच्या नियमनामुळे रेशीम शेतीला चालना मिळेल.

सध्या सोलापूर बाजार समितीत ५८ शेती उत्पादनांचे नियमन करण्यात येत असून, आता नव्याने ११ पिकांचा समावेश झाल्याने एकूण नियमनातील उत्पादनांची संख्या ६९ वर जाऊन पोहोचली आहे, असेही सभापती माने यांनी सांगितले.

शेतकऱ्यांना होणार फायदा...

या निर्णयामुळे शेतकऱ्यांना हक्काची बाजारपेठ उपलब्ध होणार असून, बाजार समितीला देखील सेसच्या उत्पन्नाचे नवीन स्रोत मिळणार आहेत, यापूर्वी हे व्यवहार अनौपचारिक पद्धतीने होत असल्याने बाजार समितीला कोणतेही अधिकार नव्हते.

आता मात्र व्यवहारात फसवणूक झाल्यास समिती कायदेशीर हस्तक्षेप करू शकेल. या पार्श्वभूमीवर, उत्तर सोलापूर तालुक्यातील हिरज येथे स्थापन झालेल्या रेशीम पार्क मुळे सोलापूरसह शेजारील जिल्ह्यांत रेशीम शेतीचे प्रमाण वाढले आहे, अशा वेळी रेशीम कोषाला नियमनात स्थान मिळाल्यामुळे या क्षेत्रातील शेतकऱ्यांना मोठा आधार मिळणार आहे.