Solapur News : पुणे जिल्ह्यात झालेल्या पावसामुळे सोलापूर जिल्ह्याची वरदायिनी असलेल्या उजनी धरणामध्ये पाणी सोडले जात असल्याने धरणाच्या पाणी पातळीत किंचित वाढ झाली आहे. आठवडाभरापूर्वी १३ टक्केंवर असलेले उजनी धरण सध्या १७ टक्क्यांपर्यंत पोचले आहे.

यंदा जून, जुलै आणि ऑगस्ट असे तीनही महिने पावसाने पाठ फिरवली. धरणातील पाणी साठे वाढण्यास हाच काळ उपयुक्त असतो, पण या तीनही महिन्यात पुरेसा पाऊस झाला नाही. फक्त धरण उणे पातळीतून अधिक पातळीत आले. यंदा धरणातील पाणीसाठा अगदी गेल्या आठवड्यापर्यंत १२ ते १३ टक्क्यांवरच स्थिर होता. पण गेल्या दोन-तीन दिवसांपासून पुणेसह परिसरात पुन्हा एकदा पावसाने हजेरी लावल्याने तिकडून उजनी धऱणाकडे पाणी सोडण्यात येत आहे. त्याचा परिणाम पाणीसाठा वाढवण्यात झाला आहे. सध्या पुण्याकडून उजनी धरणाकडे ४६२५ क्युसेक इतका पाण्याचा विसर्ग सोडण्यात येत आहे.

त्यामुळे हळूहळू पाणीसाठ्यात वाढ होत आहे. सध्या धरणातील एकूण पाणी पातळी ४९८.२७० मीटरवर आहे. तर धरणातील एकूण पाणीसाठा ७२.५९ टीएमसी आणि त्यापैकी उपयुक्त साठा ८.९३ टीएमसी एवढा आहे. तर पाण्याची टक्केवारी १६.६७ टक्के इतकी आहे.