Mumbai News: नागपूर कृषी उत्पन्न बाजार समितीमध्ये झालेल्या कथित गैरव्यवहाराची सखोल चौकशी करण्यासाठी विशेष तपास पथक (एसआयटी) स्थापन करण्यात येणार असल्याची घोषणा पणन मंत्री जयकुमार रावल यांनी शुक्रवारी (ता. १८) विधानसभेत केली.

भाजपचे आमदार कृष्णा खोपडे यांनी या प्रकरणात गंभीर स्वरूपाचे आर्थिक गैरव्यवहार झाल्याचा मुद्दा लक्षवेधी सूचनेद्वारे उपस्थित केला होता. त्यानंतर याप्रकरणी कारवाईची प्रक्रिया सुरू झाली आहे. या विशेष तपास पथकाचे अध्यक्ष नागपूरचे जिल्हाधिकारी असतील. नागपूर जिल्हा पोलीस अधीक्षक हे सदस्य तर छत्रपती संभाजीनगरचे विभागीय सहनिबंधक हे सदस्य सचिव असतील.

नागपूर कृषी उत्पन्न बाजार समितीच्या कामकाजाची सखोल चौकशी करणे, पी. एल. खंडागळे समितीने यापूर्वी सादर केलेल्या अहवालाच्या पार्श्‍वभूमीवर महसुली हानीची जबाबदारी निश्‍चित करणे, २०१७ मध्ये एल. डी. पाटील यांच्या अध्यक्षतेखाली बाजार समितीतील गाळे वाटपातील गैरव्यवहाराची चौकशी करण्यासाठी समिती स्थापन करण्यात आली होती. त्यांनी बाजार समितीकडे अहवाल सादर करण्यात आला होता.

त्या अहवालातील निष्कर्षानुसार तत्कालीन विद्यमान संचालक मंडळातील सदस्यांनी तसेच नागपूर कृषी उत्पन्न बाजार समितीतील अधिकारी, कर्मचारी यांनी भ्रष्टाचार केला आहे का? याची चौकशी ही एसआयटी करणार आहे. या आरोपांमध्ये तथ्य असल्यास संबंधितांवर फौजदारी गुन्हे दाखल करण्याचे काम समिती करणार आहे.

नागपूर कृषी उत्पन्न बाजार समितीतील व्यवहारांची पडताळणी करण्याकरिता एसआयटीला विशेष अधिकार प्रदान करण्यात आले आहेत. या विशेष तपास पथकाने ३० दिवसांच्या आत आपला अहवाल शासनास करावा, असे निर्देश देण्यात आल्याची माहिती मंत्री रावल यांनी दिली.

लाडसांगवीतील १३ एकर जमीन खरेदीची चौकशी

छत्रपती संभाजीनगर कृषी उत्पन्न बाजार समितीने लाडसावंगी उपबाजारपेठ विकसित करण्यासाठी डिसेंबर २०२४ मध्ये खरेदी केलेल्या १३ एकर जमिनीचा व्यवहार कायदेशीर आहे. तरीही या प्रकरणाची चौकशी करण्याची मागणी असेल तर तर चौकशी करू, असे आश्‍वासन पणनमंत्री रावल यांनी विधान परिषदेत दिले. या प्रकरणी सतीश चव्हाण आणि विक्रम काळे यांनी तारांकित प्रश्‍न उपस्थित केला होता.