Sharad Pawar: राष्ट्रवादी कॉँग्रेसच्या अध्यक्षपदाचा शरद पवार यांनी दिलेला राजीनामा निवड समितीने एकमताने फेटळला, अशी घोषणा निवड समितीच्या बैठकीनंतर राष्ट्रवादी कॉँग्रेसचे नेते प्रफुल्ल पटेल यांनी केली. शुक्रवारी (ता.५) निवड समितीची बैठक आयोजित करण्यात आली होती. या बैठकीत हा निर्णय एकमताने घेतल्याचे पटेल यांनी सांगितले. तसेच पवारांना याबाबत भेटून राजीनामा परत घेण्याची विनंती समिती करणार आहे. अशी माहिती पटेल यांनी दिली.

"राष्ट्रवादी कॉँग्रेस पक्षाचे अध्यक्ष आणि खासदार शरद पवार यांनी राजीनामा देण्याची इच्छा व्यक्त केली होती. परंतु कमिटी राजीनामा फेटाळत आहे. त्यामुळे पवार साहेबांनी अध्यक्ष पदावर राहावं, असा सर्वानुमते ठराव पास झाला आहे." असा ठराव पास केल्याचे पटेल यांनी पत्रकार परिषदेत सांगितले.

त्यामुळे अजूनही राष्ट्रवादी कॉँग्रेसच्या अध्यक्षपदावरून सुरू असलेली 'टर्न अँड ट्विस्ट' संपलेली नाहीत.

पवार साहेबांनी या पदावरून बाजूला होऊ नये, अशी कार्यकर्त्यांची आणि जनमाणसाची इच्छा आहे. पवार साहेबांनी आम्हाला विश्वासात घेतलं नाही. त्यावर जी कमिटी स्थापन केली होती, त्या कमिटीची बैठक पार पडली. सर्वानुमते एक ठराव पारित केला आहे. हाच ठराव घेऊन पवार साहेबांना भेटणार आहोत, असं पटेल यांनी पत्रकार परिषदेत सांगितलं.

या निर्णयामुळे तीन दिवसांपासून राजीनामा मागे घेण्याची मागणी करत विविध प्रकारे आंदोलन करणाऱ्या राष्ट्रवादी कॉँग्रेसच्या कार्यकर्त्यांनी प्रदेश कार्यालयासमोर जल्लोष साजरा केला.

दरम्यान, राष्ट्रवादी कॉंग्रेसचे अध्यक्ष शरद पवार यांनी धक्कातंत्राचा वापर करत राजकारणातून निवृत्त होत असल्याची घोषणा मंगळवारी (ता. २) केली.

आता कोणतीही निवडणूक लढवणार नाही, तसेच राष्ट्रवादी कॉँग्रेसच्या अध्यक्षपदावरून निवृत्त होणार आहे, अशी घोषणा पवार यांनी यशवंतराव चव्हाण प्रतिष्ठाण सभागृह मुंबई येथील कार्यक्रमात केली.

शरद पवार यांचे राजकीय आत्मचरित्र असलेल्या 'लोक माझे सांगाती'च्या सुधारित आवृत्तीच्या प्रकाशन सोहळ्यात पवार बोलत होते. पवारांनी निवृत्तीची घोषणा केल्यामुळे खळबळ उडाली आहे.