Ratnagiri News : चिपळुण शहरात हापूस आंबा विक्रीमध्ये परप्रांतीय विरुद्ध स्थानिक व्यापारी अशी स्पर्धा सुरू झाली आहे. परप्रांतीय विक्रेते हापूसच्या नावाखाली कर्नाटकचा आंबा विकत असल्यामुळे काही स्थानिक विक्रेत्यांनी त्यावर आक्षेप घेतला आहे. हापूस आंब्याला बदनाम करणाऱ्यांचा यापुढे बंदोबस्त करण्याचा इशारा स्थानिक विक्रेत्यांनी दिला आहे.

चिपळूण आणि गुहागरमधील हापूस आंबा अजून म्हणावा तसा बाजारात आलेला नाही. येथील विक्रेते रत्नागिरीतून आंबा आणून विकत आहेत. रत्नागिरीच्या हापूस आंब्याला स्थानिक बाजारपेठेत तसेच बाहेरगावी मोठी मागणी आहे. चिपळूणमधील आंबा विक्रेते मुंबई, पुण्यासह दुबईच्या मार्केटमध्ये आंबा विकत आहेत.

चिपळूण शहरातील गुहागर नाका हे हापूस आंबा विक्रीचे केंद्र बनले आहे. येथे परिसरातील महिला, व्यापारी हापूस आंबा विक्री करत आहेत. मात्र काही जण हापूसच्या नावाखाली कर्नाटकी आंबा अडीच ते दोन हजार रुपये शेकडा दराने विकत आहेत. त्यामुळे स्थानिक व्यापाऱ्यांची अडचण झाली आहे. गुहागर नाका येथे स्थानिक विक्रेत्यांची नुकतीच बैठक झाली. त्यात विक्रेते फैयाज भाटकर यांनी हापूसच्या नावाखाली कर्नाटकचा आंबा विकणाऱ्यांना कायदेशीर अद्दल घडविण्याचा इशारा दिला.

कोकणातील हापूसची वैशिष्ट्ये...

हापूस आंबा कापल्यावर केशरी दिसतो. पिवळेपणाची झाक त्यावर नसते.

आंबा तयार झाल्यावर त्याच्यावर सुरकुत्या पडतात.

हापूस आंब्याची साल पातळ असते. देवगडची त्याहून अधिक पातळ असते.

हापूस आंब्याची पेटी अठरा ते वीस इंच इतकी असते.