Sangli Rain : सांगली जिल्ह्यात येत्या चार दिवसांनी वातावरणात मोठ्या बदलाची शक्यता हवामान अभ्यासकांनी व्यक्त केली आहे. जिल्ह्यात शनिवारपासून (ता. २५) तीन दिवस हलका ते मध्यम स्वरुपाच्या पावसाची शक्यता आहे.

सांगली जिल्ह्यातील फुलोरासाठी तयार द्राक्षबागांना फटका बसण्याचा अंदाज आहे. रब्बी हंगामातील शाळू, हरभरा पिकांसाठी बदलत्या वातावरणाचा फायदा होणार आहे.

बंगालच्या उपसागरातील समुद्राच्या पृष्ठभागाचे तापमान अधिक असल्याने कमी दाबाचे क्षेत्र विकसित होण्यासाठी अनुकूल वातावरण आहे. बुधवारी (२२) चेन्नईजवळ कमी दाबाचे क्षेत्र सक्रिय राहील. त्यामुळे बऱ्याच प्रमाणात बाष्पयुक्त वारे आपल्या विभागात येतील. उत्तरेकडून येणाऱ्या थंड वाऱ्यांमुळे ढगांमध्ये रूपांतर होईल.

पावसासाठी अनुकूल वातावरण तयार होईल. गुरुवारपासून (२३) ढगांची गर्दी वाढेल. पावसासाठी अनुकुल वातावरण तयार होऊ लागेल. मोठा अथवा जोरदार पाऊस होईल, असे वाटत नाही. मात्र हलक्या सरी बहुतांश ठिकाणी राहू शकतात.

सोलापूर, कोल्हापूर, सांगली, सातारा परिसरात शक्यतो पश्चिमेकडील भागात हलक्या सरी होतील. सांगली, सोलापूर परिसरात शनिवारी व रविवारी (२६) पावसाची शक्यता आहे.