Ahilyanagar News : पंतप्रधान घरकुल योजनेतून अहिल्यानगर जिल्ह्यातील ग्रामीण भागात पहिल्या आता दुसऱ्या टप्प्यात ८२ हजार ९७६ घरकुलांचे उद्दिष्ट निश्चित करून त्या घरकुलांना मंजुरी दिली आहे. मंजूर केलेली सर्व घरकुले पूर्ण केली जाणार आहेत. पहिल्या टप्प्यात ५५ हजार ४९५ घरकुलांची कामे पूर्ण झाली असून त्याचा ताबा सबंधित लाभार्थ्यांना देण्यात आला आहे.

ग्रामीण भागात गरीब, घरे नसलेल्या कुटुंबाला पंतप्रधान घरकुल योजनेतून घरे मिळावीत यासाठी सरकारी पातळीवर प्रयत्न सुरू आहेत. ग्रामीण भागासाठी यंदा पंतप्रधान घरकुल योजनेचा दुसरा टप्पा सुरू करण्यात आला आहे. अहिल्यानगर जिल्ह्यात या टप्प्यात ८२ हजार ९७६ घरे बांधण्याचे उद्दिष्ठ ठेवले असून त्या सर्व लाभार्थ्यांच्या सर्व घरांना मंजुरी दिली आहे.

घरकुल योजनेतून जास्तीत जास्त घरे बांधण्यासाठी आणि ती दर्जेदार व्हावीत यासह घरकुल मंजूर होऊनही जागा नसल्याने घरापासून वंचित राहत असलेल्या लाभार्थ्यांना जागा उपलब्ध देण्यासाठी प्रयत्न केले जात आहेत. घरकुल मंजूर झाले परंतु घर बांधण्याला जागा नसलेल्या लाभार्थ्यांना जागा उपलब्ध करून दिली जात आहे.

राहाता, श्रीरामपूर, कोपरगाव तालुक्यात गावठाणाचा विस्तार करून जागा उपलब्ध करून दिली जात आहे. प्रत्येक गावामध्ये सरपंच, ग्रामसेवक यांच्या माध्यमातून गावठाण विस्तारीत प्रस्ताव मंजूर करून घेण्याबरोबरच गायरानातील घरकुले नियमित करून घेण्यासाठी विशेष मोहीम आखण्याचेही प्रयत्न सुरू आहेत.

पंतप्रधान घरकुल योजनेतून घरे उभारणी करताना घरांचे काम दर्जेदार व्हावे यासाठी प्रयत्न केली जात आहेत. लाभार्थ्यांनी दर्जेदार घर कसे उभारावे, याबाबत मार्गदर्शन व्हावे म्हणून घरकुलाच्या १५ डेमो घरांची जिल्ह्यात उभारणी करण्यात आली आहे. दुसऱ्या टप्प्यातील उद्दिष्ठ निश्चित केलेल्या घरकुलांना मंजुरी दिलेली आहे.

तालुकानिहाय होणारी घरकुले

अकोले ः १३,६६४, जामखेड ः ४,०९०, कर्जत ः ६,२५८, कोपरगाव ः ५,०८६, अहिल्यानगर ः ४,४५०, नेवासा ः ७,२४१, पारनेर ः ४,१२३, पाथर्डी ः ५,७३२, राहाता ः ३,७६९, राहुरी ः ५,१४५, संगमनेर ः ९,१७९, शेवगाव ः ५,६८८, श्रीगोंदा ः ३,८३८, संगमनेर ः ४,५१३