ॲग्रोवन वृत्तसेवा

Nanded News : नांदेड : टोमॅटोची पांगरी म्हणून ओळखल्या जाणाऱ्या पांगरीत शेतकऱ्यांवर आर्थिक संकट कोसळेले आहे. तयार होणाऱ्या टोमॅटोवर पांढरे डाग पडत असल्याने बाजारात दर मिळत नाहीत. परिणामी शेतकऱ्यांचा लागवड खर्च निघत नसल्याने टोमॅटो पिकावर रोटाव्हेटर फिरवावा लागत आहे.

पांगरीमधील साठ ते सत्तर शेतकऱ्यांच्या दीड ते दोन कोटींच्यावर उत्पन्नावर पाणी पडले आहे. या फटक्यामुळे शेतकरी हवालदिल झाल्यामुळे प्रशासनाने पंचनामे करून नुकसान भरपाई द्यावी, अशी मागणी केली जात आहे.

अर्धापूर तालुक्यातील पांगरी येथील शेतकरी टोमॅटोची लागवड दरवर्षी करतात. यंदा या गावातील साठ ते सत्तर शेतकऱ्यांनी तीन महिन्यांपूर्वी एका नामांकीत कंपनीच्या टोमॅटोची लागवड केली. पिकाला वेळेवर खत, मशागत, पाणी, कीटकनाशक फवारणी करून जोपासना केली. फळधारणाही चांगली झाली. पण टोमॅटो आतून भरला नाही. तसेच फळांवर पांढरे डाग पडले. याचा परिणाम भावावर झाला.

टोमॅटोच्या २५ किलोला साठ ते सत्तर रुपये मिळत आहेत. यात तोडणी व वाहतुकीचा खर्चही निघत नाही. लागवड खर्च तर वेगळा राहिला. दरम्यान आमच्या गावातील सुमारे साठ ते सत्तर शेतकऱ्यांनी टोमॅटोची लागवड केली. टोमॅटोचा एकरी खर्च पन्नास हजार झाला आहे. झाडांना फळधारणाही झाली. परंतु फळे आतून न भरल्याने भाव मिळत नाही. यात शेतकऱ्यांचे एकरी दोन लाखांचे नुकसान झाले आहे. प्रशासन, कृषी विभाग व संबंधित कंपनीने झालेल्या नुकसानीचे तातडीने पंचनामे करून भरपाई द्यावी, अशी मागणी सखाराम दुधाटे या शेतकऱ्याने केली.

पांगरी येथील टोमॅटो उत्पादक शेतकऱ्यांच्या झालेल्या नुकसानीची माहिती मिळाली. तालुका कृषी अधिकाऱ्यांना कायदेशीर कारवाई करण्याचे आदेश देण्यात आले आहेत, अशी माहिती तहसीलदार रेणुकादास देवणीकर यांनी दिली. पांगरी येथील टोमॅटो शेतीची पाहणी करून या विषयी कृषी शास्त्रज्ञांना व संबंधित कंपनीच्या अधिकाऱ्यांना माहिती देण्यात येईल. शेतकऱ्यांनी तक्रारी दिल्यानंतर पुढील कायदेशीर कारवाई करण्यात येईल, अशी माहिती तालुका कृषी अधिकारी विशाल बिऱ्हाडे यांनी दिली.