Nashik News : कृषी क्षेत्राला चालना देण्यासाठी रोटरी क्लब ऑफ नाशिकतर्फे विविध उपक्रमांचे आयोजन करण्यात येते. त्याचाच भाग म्हणून सभासदांसाठी दिंडोरी तालुक्यातील वारे शिवारातील टिटवे या आदिवासीबहुल गावात ‘कृषी मंथन’ कार्यक्रमांतर्गत शिवार फेरीचे आयोजन करण्यात आले होते. या माध्यमातून आदिवासी भागात कृषी पर्यटनाला चालना मिळत आहे.

रोटरी क्लब ऑफ नाशिक सभासदांसाठी विविध उपक्रम घेत असते. त्याअंतर्गत हा कार्यक्रम घेण्यात आला. टिटवे गाव स्ट्रॉबेरी शेतीसाठी प्रसिद्ध असून, गावातील शेतकऱ्यांनी पारंपरिक पिकांपेक्षा स्ट्रॉबेरीकडे लक्ष केंद्रित करून आपले आर्थिक उत्पन्न वाढविले आहे.

रोटरी क्लब सभासद व कुटुंबीयांनी स्ट्रॉबेरी तोडून खाण्याची मजा या वेळी लुटली. सभोवतालच्या परिसरात ट्रॅक्टरने भटकंती करून आदिवासी शेतकऱ्यांशी संवाद साधत त्यांचे लोकजीवन अभ्यासले.

याप्रसंगी कृषितज्ज्ञ डॉ. रामनाथ जगताप, विभागीय कृषी अधिकारी योगेश खैरनार व श्यामकांत पाटील यांनी शेतकऱ्यांना स्ट्रॉबेरी शेतीची माहिती व उत्पादन तंत्रज्ञानाविषयी मार्गदर्शन केले.

स्ट्रॉबेरी सुरत व अहमदाबाद येथे विक्रीसाठी पाठवली जाते. या परिसरातील बहुसंख्य शेतकरी याकृषिमंथन कार्यक्रमासाठी उपस्थित होते.