Bhivandi News: दरवर्षी १ ते ७ ऑगस्ट दरम्यान साजऱ्या होणाऱ्या महसूल सप्ताहानिमित्त भिवंडी तालुक्यात पाणंद शिवरस्त्यांचे सर्वेक्षण व मोजणी करण्यात आली. हे कार्य तहसीलदार अभिजित खोल यांच्या मार्गदर्शनाखाली, नायब तहसीलदार विशाल इंदुलकर आणि आदेश म्हात्रे यांच्या नेतृत्वाखाली सर्व मंडळ अधिकारी, ग्राम महसूल अधिकाऱ्यांनी यांनी रविवारी (ता. ३) पार पडले.

तालुक्यातील सर्व मंडळ अधिकारी व ग्राम महसूल अधिकाऱ्यांनी विविध गावांतील पाणंद रस्त्यांची मोजणी केली. या रस्त्यांवरील अतिक्रमणांचे सर्वेक्षण करून ते हटवले जाणार आहे. यानंतर ग्रामपंचायतीमार्फत खड्डे तयार करून, ग्रामस्थांच्या श्रमदानातून रस्त्याच्या दुतर्फा वृक्षारोपण करण्यात येणार आहे.

मालकी हक्कासाठी जमिनीचे पट्टे वाटप

याशिवाय महसूल सप्ताहाच्या पार्श्वभूमीवर २०११ पर्यंत शासकीय जमिनीवर अतिक्रमण करून वास्तव्यास असलेल्या कुटुंबांना नियमित करण्यासाठी जमिनीचे पट्टे वाटप करण्यात येणार आहे. त्यामुळे हे कुटुंबे त्या जागेचे कायदेशीर मालक होणार आहेत, अशी माहिती खोल यांनी दिली. हा उपक्रम महसूल विभागाच्या माध्यमातून लोकहितासाठी राबवण्यात येत असून, स्थानिक नागरिकांमध्ये समाधानाची भावना निर्माण झाली आहे.