Buldana News: शेतकऱ्यांच्या हक्काचा पीकविमा, सोयाबीन-कापूस भाव फरक, ‘नाफेड’मध्ये अडकलेली शेतकऱ्यांची रक्कम, रखडलेले अनुदान, शेतीला कुंपण यांसह शेतकऱ्यांच्या इतर मागण्या घेऊन आठवडाभरात जिल्हाभर मोठी यात्रा काढण्याची घोषणा शेतकरी नेते रविकांत तुपकर यांनी केली.

सरकारवर दबाव वाढवून शेतकऱ्यांचे प्रश्‍न लावून धरण्यासाठी आता रस्त्यावरची लढाई लढणार असल्याचे जाहीर केले. क्रांतिकारी शेतकरी संघटनेची महत्त्वपूर्ण बैठक मंगळवारी (ता. २५) बुलडाण्यात झाली. या वेळी संघटनेचे कार्यकर्ते, शेतकरी उपस्थित होते. बैठकीत अनेकांनी क्रांतिकारी शेतकरी संघटनेमध्ये प्रवेश केला.

तुपकर पुढे म्हणाले, की आपण कधीच निवडणूक डोळ्यासमोर ठेवून काम करीत नाही. शेतकऱ्यांच्या समस्या घेऊन आता जिल्हाभर यात्रा करणार आहे. नंतर मुंबईकडे कुच करणार आहोत.

महाराष्ट्रात शेतकरी चळवळी आता क्षीण झाल्या आहेत. त्यामुळे शेतकऱ्यांना आधार देण्यासाठी क्रांतिकारी शेतकरी संघटना पुढाकार घेणार आहे. आपल्या चळवळीवर लोकांचा विश्‍वास आहे. मी रस्त्यावर उतरणारा कार्यकर्ता आहे. यासाठी कार्यकर्त्याने रस्त्यावर उतरले पाहिजे.