Nagar News : येथे जनावरांच्या चाऱ्याचे भाव वाढले असून उसाच्या तोडी आता जवळ जवळ संपत आल्याने उसाचे वाढे मिळणे दुरापास्त झाले आहे. त्याचबरोबर शेतात शेतकऱ्यांनी चाऱ्याची पिके न घेता रब्बीची पिके घेतल्याने यामध्ये गहू व हरभरा या पिकांची पेरणी केल्याने चारा पिकांची वानवा तयार झाली आहे.

उसाचा चारा आता प्रति टन २८०० ते ३१०० असा विकत आहे. आताच उन्हाळ्याची दाहकता बागायत पट्ट्यातील या गावांमध्ये दिसू लागली आहे. पुढील काळात पशुधन जगवायचे कसे, असा प्रश्न पशुपालकांना पडला आहे.

बहुतेक शेतकरी थोड्या फार प्रमाणात चाऱ्याचे उत्पादन करतात. मात्र, बराचसा चारा बाहेरून विकत घेऊन दुग्ध व्यवसाय सुरू ठेवण्याचे नियोजन शेतकरी करीत असतात. मात्र, दुधाचा भाव नसल्याने शेतकऱ्यांचे आर्थिक व्यवहार कोलमडले आहेत.

त्यामुळे ग्रामीण बाजारपेठेत आर्थिक उलाढाल कमालीची थंडावली आहे. उसाबरोबर मका, कडबा आदी पिकांनाही चाऱ्यासाठी चांगला भाव मिळत आहे. मात्र, पशुपालकांची चारा खरेदी करताना दमछाक होत आहे.